ევროპული საბჭოს პრეზიდენტი შარლ მიშელი, ევროკომისიის პრეზიდენტი ურსულა ფონ დერ ლაიენი და ევროპარლამენტის პრეზიდენტი რობერტა მეცოლა უახლოეს მომავალში შესაძლოა, საქართველოში ჩამოვიდნენ. ამის შესახებ საქართველოს პრეზიდენტმა სალომე ზურაბიშვილმა ბრიუსელში, მათთან პირადად შეხვედრის შემდეგ განაცხადა. 

„შარლ მიშელმაც და ურსულა ფონ დერ ლაიენმაც, ორივემ თქვა, რომ აპირებენ [საქართველოში] ჩამოსვლას. ასევე ევროპარლამენტის თავმჯდომარეც აპირებს ჩამოსვლას. ეს სამი ადამიანი თუ ჩამოდის ჩვენთან ამ ექვს თვეში, ეს იმას ნიშნავს, რომ საქართველოზე არ უთქვამთ უარი და ხედავენ, თუ რამდენად მნიშვნელოვანია“, - განუცხადა სალომე ზურაბიშვილმა მედიის წარმომადგენლებს ევროპარლამენტში სიტყვით გამოსვლის შემდეგ.