საქართველოში პოლონეთის საელჩოსთან სტუდენტებმა საპროტესტო აქცია გამართეს და მოითხოვეს, რომ პოლონეთის პრემიერ-მინისტრმა, დონალდ ტუსკმა ბოდიში მოიხადოს უვიზო რეჟიმის შესაძლო შეჩერების შესახებ გაკეთებული განცხადების გამო.
სტუდენტების აზრით, პოლონეთის პრემეირ-მინისტრის პოზიცია ქართველი ხალხის შანტაჟს ისახავს მიზნად, რასაც საქართველო არ იმსახურებს.
„ბატონმა ტუსკმა ბოდიში უნდა მოუხადოს ქართველ ხალხს შანტაჟის ენის გამოყენებისთვის, რასაც ჰქონდა ადგილი. ქართველი ხალხი ყოველთვის იყო პოლონელი ხალხის მეგობარი. ასევე, პოლონელი ხალხის დამოკიდებულება არის მეგობრული და ბატონი ტუსკი მხოლოდ და მხოლოდ ატარებს თავის პირად ინტერესებს და „დიფ სთეითის“ მეგობარია. ჩვენ ვითხოვთ, რომ ბატონმა ტუსკმა მოიხადოს ბოდიში ქართველი ხალხის წინაშე. ეს არის მხოლოდ მისი პირადი ინტერესის გატარება და არ იმსახურებს ქართველი ხალხი თუნდაც ვიზალიბერალიზაციის გაუქმებას. ეს არის ერთ-ერთი ბერკეტი ქართველი ხალხის დასაშანტაჟებლად“, – განაცხადა აქციის მონაწილე სტუდენტმა, ხატია როსტომაშვილმა.
11 ივნისს, დონალდ ტუსკმა პოლონეთის პარლამენტში მთავრობისთვის ნდობის საკითხზე კენჭისყრამდე სიტყვით გამოსვლისას განაცხადა, რომ მზად არის, ყველა ხელმისაწვდომი მეთოდი გამოვიყენოს „საერთაშორისო სამართლის შესაცვლელად, რომ უკანონო მიგრაციის რისკი მინიმუმამდე შევამციროთ“. დონალდ ტუსკის თქმით, საჭიროა უმრავლესობა, რათა შეიზღუდოს ან შეჩერდეს უვიზო მიმოსვლა, მათ შორის, საქართველოსთან.
0
0
