12/06/2024
12:56
კულტურა
![main-img]( /storage/files/%E1%83%90%E1%83%A2%E1%83%90%E1%83%99%E1%83%98.png )
Black Sea Arena ფეისბუკის გვერდზე ავრცელებს განცხადებას, რომლის თანახმადაც ჯგუფის MASSIVE ATTACK-ის 28 ივლისს დაგეგმილი კონცერტი გაუქმებულია. განცხადებაში კონცერტის გაუქმების მიზეზი არაა ახსნილი, მხოლოდ ის წერია, რომ ბილეთის მფლობელებს გადახდილი თანხა აუნაზღაურდებათ ეტაპობრივად.
“სამწუხაროდ უნდა გაცნობოთ, რომ 28 ივლისს, Black Sea Arena-ზე დაგეგმილი MASSIVE ATTACK-ის კონცერტი გაუქმებულია. ბილეთის მფლობელებს გადახდილი თანხა აუნაზღაურდებათ ეტაპობრივად, დეტალების შესახებ ინფორმაციას მიიღებთ უახლოეს მომავალში.” - წერია განცხადებაში.
25 აპრილს ჯგუფს ქართველი ხალხის სახელით მოძრაობა “სირცხვილიამ” მიმართა და Massive Attack-ს მოუწოდა, საქართველოში კონცერტის გამართვამდე გაეცნონ ქვეყანაში არსებულ “საგანგაშო პოლიტიკურ ვითარებას” და განსჯის საფუძველზე გადადგან საპასუხო ნაბიჯი.
მოძრაობის მიერ გავრცელებულ მიმართვის ტექსტში საუბარი იყო “ოლიგარქიულ მმართველობაზე”, “აგენტების კანონზე”, საკონსტიტუციო ცვლილებაზე – “ანტი-ლგბტ კანონზე”, “ოფშორების კანონსა” და “ძალადობრივ რეპრესიებზე”. მათი თქმით, დემოკრატიული ღირებულებებისთვის მებრძოლ საზოგადოებას, მთავრობა დემონსტრაციების დროს “სისასტიკით პასუხობს.
ბრიტანული ჯგუფის, Massive Attack-ის კონცერტი 28 ივლისს 21:00 საათზე შეკვეთილში, Black Sea Arena-ზე იყო დაგეგმილი. ჯგუფი მთავრობის მხარდაჭერილი კამპანიის – Starring Georgia-ს ფარგლებში უნდა ჩამოსულიყო.
0
0