ავჭალის სარაგბო სტადიონზე საქართველოსა და ისრაელის რაგბის კავშირის პრეზიდენტებმა ხელს მოაწერეს მემორანდუმს – საქართველოს რაგბის კავშირი ისრაელის გუნდებს პროფესიულ გაძლიერებაში დაეხმარება.

მორაგბეები ისრაელიდან წვრთნებს საქართველოში, ჩვენი სპეციალისტების მეთვალყურეობით გაივლიან. თანამშრომლობა როგორც კაცთა, ასევე ქალთა სარაგბო გუნდებს მოიცავს.

ანალოგიურ პარტნიორობას საქართველოს რაგბის კავშირი უკვე უწევს ყაზახეთისა და აზერბაიჯანის რაგბის კავშირებს, ინტერესს გამოთქვამს პოლონეთიც.

შეგახსენებთ, რომ რაგბი ევროპის სუპერთასის ფინალში „შავმა ლომმა“ თბილისში, „ავჭალის“ სტადიონზე დღეს სწორედ ისრაელის წარმომადგენელს, „თელ-ავივ ჰითს“ უმასპინძლა, 27:17 დაამარცხა და ტიტული ზედიზედ მესამედ მოიპოვა.