საქართველო არ აპირებს უარი თქვას რევანშისტურ იდეებზე „სამხრეთ ოსეთისა“ და აფხაზეთის ტერიტორიების შემადგენლობაში დაბრუნების შესახებ. ეს განცხადება ოკუპირებული ე.წ. სამხრეთ ოსეთის საგარეო დაზვერვის დეფაქტო სამსახურის ხელმძღვანელმა ალექსეი ვარზიევმა გააკეთა.

მისი თქმით, უკრაინასა და მთიან ყარაბაღში განვითარებულ მოვლენებთან დაკავშირებით, „ერთის მხრივ რუსეთს და მეორე მხრივ დასავლეთის ალიანსის ქვეყნებს შორის მზარდი სამხედრო-პოლიტიკური დაპირისპირება ხდება. შეინიშნება ანტიოსური და ანტირუსული ძალების პროვოკაციული მოქმედებების გააქტიურება საქართველოს ტერიტორიაზე“.

„მიუხედავად ოფიციალური თბილისის სამშვიდობო რიტორიკისა, რომელიც ამ ეტაპზე საკმაოდ დაბალანსებულ პოზიციას იცავს, რომელიც ეფუძნება რუსეთის ფედერაციასთან ურთიერთობაში დაპირისპირების თავიდან აცილებას, ქართულ საზოგადოებაში მატულობს რევანშისტული განწყობები, რასაც დასავლეთი აქტიურად უწყობს ხელს. უფრო მეტიც, ვაშინგტონისა და ბრიუსელის აშკარა ზეწოლა საქართველოს ხელმძღვანელობაზე იზრდება. მიზანი აშკარაა - აიძულოს თბილისი, სამხრეთ ოსეთის ტერიტორიაზე რუსეთის წინააღმდეგ „მეორე ფრონტი“ გახსნას“, - განაცხადა ვარზიევმა.

მან დასძინა, რომ „ამ საქმეში შეერთებული შტატები და მისი თანამგზავრები ეყრდნობიან უკრაინაში მებრძოლი ქართული ნაციონალისტური და ნეოფაშისტური ორგანიზაციების წევრებს“.

„ასე რომ, კერძოდ, გასამხედროებული ფორმირებების „ქართული ეროვნული ლეგიონის“ და „კავკასიური ლეგიონის“ ხელმძღვანელობა ინტერნეტში სოციალური ქსელების საშუალებით ღიად აცხადებს, რომ რუსეთის წინააღმდეგ ბრძოლის შემდეგი ეტაპი უახლოეს მომავალში იქნება ტერიტორიის აღდგენა. საქართველოს გამთლიანება. თუმცა, საქართველოს მთავრობას ამჟამად არ აქვს მტკიცე რწმენა, რომ სამხედრო ქმედება მოიტანს მოსალოდნელ შედეგს, კერძოდ, სამხრეთ ოსეთისა და აფხაზეთის ტერიტორიების „დაბრუნებას“. ქართული საზოგადოების გონიერი ნაწილიც კამათობს“ - განაცხადა მან.

რუსეთის ФСБ-ის რეზერვის პოლკოვნიკი ალექსეი ვარზიევი ოკუპირებული ე.წ. სამხრეთ ოსეთის დაზვერვის უფროსად 2017 წელს დაინიშნა.