სიტუაცია დაიძაბა საგარეო კომიტეტის სხდომაზე, სადაც „უცხოური გავლენის აგენტების“ შესახებ კანონპროექტის განხილვა უნდა დაწყებულიყო. ფიზიკური დაპირისპირება მოხდა ოპოზიციის და უმრავლესობის, ასევე „ხალხის ძალის“ დეპუტატებს შორის.

„არა რუსულ კანონს“, „შეწყვიტეთ რუსული კანონის განხილვა“, - სკანდირებენ ოპოზიციონერი დეპუტატები.

ასევე დაძაბულობაა პარლამენტის დერეფნებში, სადაც მედიის და არასამთავრობო ორგანიზაციების წარმომადგენლები არიან შეკრებილი. აქცია მიმდინარეობს საკანონმდებლო ორგანოს წინაც.

პარლამენტში, „უცხოური გავლენის აგენტების“ შესახებ კანონპროექტის პირველი საკომიტეტო განხილვა 15:30 საათზე უნდა დაწყებულიყო. 

„ნიკოლოზ, არ გაქვს უფლება, ეს რუსული კანონი განიხილო“,- მიმართა გიორგი ვაშაძემ საგარეო ურთიერთობათა კომიტეტის თავმჯდომარე ნიკოლოზ სამხარაძეს.

პარლამენტის მანდატურის სამსახურმა პარტია „დროას“ ერთ-ერთი წევრი გიგა ლემონჯავა დარბაზიდან ძალის გამოყენებით გაიყვანა. მანდატურის სამსახური დარბაზიდან სხვა პოლიტიკოსების გაყვანასაც ცდილობენ, რომლებსაც დეპუტატის მანდატი არ აქვთ. მათ შორის არის „ნაციონალური მოძრაობის“ თავმჯდომარე ლევან ხაბეიშვილი.

„პუტინისტო”, რუსო, „შეგეწერა“. მთელი მსოფლიო გეუბნება, რომ რუსი ხარ“,- მიმართა ხაბეიშვილმა კომიტეტის თავმჯდომარეს ნიკოლოზ სამხარაძეს.

დაპირისპირების შედეგად დაზიანდა დარბაზში მდგომი მაგიდებიც.