საერთაშორისო ოპერაციის ფარგლებში სამართალდამცავებმა ვებგვერდი „ქიდფლიქსი“დახურეს. როგორც ევროპოლი მიუთითებს, საუბარია მსოფლიოში ყველზე დიდ პლატფორმაზე, სადაც ბავშვების პორნოგრაფიული მასალა ვრცელდებოდა.

გამოძიების ინფორმაციით, აღნიშნული ვებგვერდის მომსახურებით 1,8 მილიონი პედოფილი სარგებლობდა.

„ჩვენ ძლიერი დარტყმა მივაყენეთ ბავშვების პორნოგრაფიას. ეს არის ათწლეულების განმავლობაში ყველაზე ძლიერი დარტყმა“, – განაცხადა ბავარიის მიწის პოლიციის წარმომადგენლებმა.

სამართალდამცველების ინფორმაციით, აღნიშნულ ვეგგვერდთან წვდომა 180 დოლარი ღირდა.

პლატფორმაზე განთავსებული იყო ფოტო/ვიდეო მასალა, რომელშიც ბავშვებზე ძალადობა იყო ასახული. გამოძიებამ ამ დროისთვის 1400 ეჭვმიტანილი გამოავლინა, 79 პირი დააკავეს.

საერთაშორისო ოპერაციაში მონაწილეობდნენ ევროკავშირის წევრი ქვეყნები, ასევე ალბანეთი, ახალი ზელენდია და სხვა ქვეყნები.

გამოძიების ფარგლებში ჩხრეკა ჩატარდა 31 ქვეყანაში მდებარე ობიექტებში.

ეჭვმიტანილების საცხოვრებელი ადგილებიდან ამოღებულია ინფორმაციის შემნახველი ათასობით ციფრული მოწყობილობა და კომპიუტერები.

ეჭვმიტანილებს შორის არიან არა მხოლოდ ის პირები, რომლებიც ვებგვერდზე პორნოგრაფიულ მასალას ტვირთავდნენ, არამედ ვინც ამ ფოტო/ვიდეოს ეცნობოდა და ბავშვებზე ძალადობაში მონაწილეობდა.

გამოძიების ფარგლებში ევროპოლმა დაცვის ქვეშ აიყვანა სხვადასხვა ქვეყანაში მყოფი 39 არასრულწლოვანი.

სამართალდამცავების ინფორმაციით „ქიდფლიქსი“ 2021 წელს შეიქმნა და მსოფლიოში ყველაზე დიდი პლატფორმაა, სადაც ბავშვების მონაწილეობით პორნოგრაფიული მასალა ვრცელდებოდა.

2025 წლის მარტში გერმანელმა და ჰოლანდიელმა გამომძიებლებმა ვებგვერდის სერვერი ამოიღეს, რომელზეც ბავშვების პორნოგრაფიის ამსახველი 72 000 ვიდეო ინახებოდა.