რუსული ფქვილის უმსხვილესი მყიდველი 2023 წლის 10 თვის განმავლობაში ერაყი იყო, მეორე ადგილზეა საქართველო. ამის შესახებ „ინტერფაქსი“ აგროექსპორტის ცენტრზე დაყრდნობით იუწყება.

იანვარ-ოქტომბერში ერაყში 150 ათას ტონაზე მეტი რუსული ფქვილი, საქართველოში კი 126 ათასი ტონა გაიგზავნა.

მესამე ადგილზე ჩინეთია, რომელმაც რუსული ფქვილის შესყიდვა 3,7-ჯერ გაზარდა და 100 ათას ტონაზე მეტი შეადგინა.

რუსეთიდან ხორბლისა და ხორბლის ჭვავის ფქვილის მთლიანმა ექსპორტმა 990 ათასი ტონა შეადგინა.

მანამდე საქართველოს ეკონომიკის მინისტრმა ლევან დავითაშვილმა კომერციული სექტორისთვის გაზის გაძვირების კომენტირებისას განაცხადა, რომ ცვლილება თონეებზე გავლენას არ მოახდენს და ქვეყანაში პურის გაძვირების მიზეზი არ არსებობს.