რუსთაველის გამზირზე აქციის მონაწილეები შობის დღესასწაულს ერთად შეხვდნენ და საშობაო ალილო შეასრულეს.

ცოტა ხნის წინ ქაშუეთის ტაძართან ექსპრეზიდენტი, სალომე ზურაბიშვილი მივიდა და შობის დღესასწაულს აქციის მონაწილეებთან ერთად შეხვდა.

სალომე ზურაბიშვილის თქმით, რუსთაველის გამზირზე შეკრებილ ადამიანებს აქვთ შინაგანი რწმენა, რომ „ეს არის იმდენად მართალი საქმე და მიზანი, არ შეიძლება არ გავიმარჯვოთ და ეს ქვეყანა არ დავაბრუნოთ იქ, სადაც უნდა მიდიოდეს“.

"ეს არის არაჩვეულებრივი ნიშანი იმის, რომ ეს საზოგადოება არის დაუმარცხებელი. 40 დღე არაფერი არ არის და 80 დღეც არაფერი არ არის, თუ შენ გჯერა, რომ ბოლოს არის გამარჯვება. მგონი, აქ ვინც არის შეკრებილი ყველას აქვს ეს შინაგანი რწმენა. დღეს არის რწმენის დღე. რწმენა, რომ ეს არის იმდენად მართალი საქმე და მიზანი, არ შეიძლება არ გავიმარჯვოთ და ეს ქვეყანა არ დავაბრუნოთ იქ, სადაც უნდა მიდიოდეს და ისე როგორც უნდა ვითარდებოდეს ქვეყანა. ეს ყველაფერი ჩვენ წინ არის და ამას მივაღწევთ, დარწმუნებით ვარ.

პარტნიორები მხარს გვიჭერენ და ძალიან მნიშვნელოვანია, მაგრამ მთავარი არის ის, რაც აქ ხდება, რუსთაველის გამზირზე. ეს არის მთავარი გამარჯვება. რუსთაველის გამზირი არის ის ადგილი, რომელიც მოგვიტანს გამარჯვებას", - განაცხადა სალომე ზურაბიშვილმა.

სალომე ზურაბიშვილის თქმით, თუ ხალხმა შეძლო გაერთიანება, ეს უკვე გამარჯვებაა.

რუსთაველის გამზირზე აქციის მონაწილეებს დანთებული აქვთ სანთლები და ერთმანეთს შობას ულოცავენ.