ერთ-ერთმა უმსხვილესმა რუსულმა გამომცემლობა AST-მ განაცხადა, რომ შეაჩერა მწერლების, ბორის აკუნინისა და დიმიტრი ბიკოვის წიგნების გაყიდვა. გამომცემლობის გენერალური დირექტორის, პაველ გრიშკოვის სახელით გავრცელებულ განცხადებაში ნათქვამია, რომ მწერლების „ზოგიერთი“ საჯარო განცხადება, რომლებმაც "საზოგადოების ფართო პროტესტი გამოიწვია, "სამართლებრივ შეფასებას“ საჭიროებს. "სანამ სიტუაცია არ გაირკვევა, წიგნების გამოშვება და გადაზიდვა არ განახლდება", - ნათქვამია AST-ის განცხადებაში.

გარდა ამისა, აკუნინისა და ბიკოვის წიგნები გაყიდვიდან ამოიღო მაღაზიათა ქსელმა „ჩიტაი გოროდ-ბუკვოედმა“, რომელიც ჰოლდინგ Eksmo-AST-ს ეკუთვნის. ასეთი ქმედება ჰოლდინგში "მწერლების ბოლოდროინდელი განცხადებებით" ახსნეს.

ბორის აკუნინი (გრიგორი ჩხარტიშვილი) და დიმიტრი ბიკოვი საზღვარგარეთ ცხოვრობენ და აქტიურად ეწინააღმდეგებიან უკრაინაში რუსეთის შეჭრას.