რუსეთის იერიშის შედეგად, დონეცკის ოლქში სამი ადამიანი დაიღუპა, დაშავებულია ერთი პირი.

როგორც უკრაინული მედია იტყობინება, დაღუპულთაგან ორი მირნოჰრადზე თავდასხმას, ერთი პირი კი სტარორაისკზე იერიშს ემსხვერპლა.

მედიის ინფორმაციით, ბოლო 24 საათის განმავლობაში რუსებმა ფრონტის ხაზსა და საცხოვრებელ სექტორზე 2 328 დარტყმა განახორციელეს. თავდასხმის სამიზნე იყო ხუთი დასახლებული პუნქტი – მიკოლაევკა, მირნოგრადი, სლოვიანსკი, რაიგოროდოკი, სტარორაისკე, ასევე კრამატორსკი.

გავრცელებული ინფორმაციით, საერთო ჯამში, დაზიანებულია 19 სამოქალაქო ობიექტი, მათ შორის ეკლესია და 18 საცხოვრებელი შენობა. რუსებმა თავდასხმისთვის „იტალმასის“ და „მოლნია-2-ის“ ტიპის უპილოტო საფრენი აპარატები გამოიყენეს.

ფაქტზე აღიძრა სისხლის სამართლის საქმე უკრაინის სისხლის სამართლის კოდექსის 438-ე მუხლით, რაც ომის დანაშაულის ჩადენას გულისხმობს.