ევროკავშირი ინდოეთთან თანამშრომლობის გაღრმავებას გეგმავს.
ევროკავშირი და ინდოეთი თავისუფალი ვაჭრობის შესახებ შეთანხმების მოლაპარაკების ბოლო ეტაპზე არიან, რომლის დადებასაც ორივე მხარე წლის ბოლომდე გეგმავს. 2022 წელს განახლებული მოლაპარაკებები აშშ-ის პრეზიდენტ დონალდ ტრამპის ხელახალი არჩევის შემდეგ დაჩქარდა.
„როიტერის“ ინფორმაციით, ტრამპის მიერ დაწესებული ტარიფების წინაშე ორივე მხარე ახალი ალიანსების ჩამოყალიბების დაჩქარებული ძალისხმევისკენ ისწრაფვის. ბრიუსელისთვის ეს ნიშნავს დაგეგმილ სავაჭრო შეთანხმებებს მექსიკასთან, სამხრეთ ამერიკის ბლოკ „მერკოსურთან“, ინდოეთთან და ინდონეზიასთან.
ინდოეთი პერსპექტივას ხედავს ევროკავშირში, ასევე ჩინეთსა და რუსეთში.
ინდოეთმა რუსული ნავთობის შესყიდვები 2022 წელს რუსეთის მიერ უკრაინაში სრულმასშტაბიანი შეჭრის შემდეგ გაზარდა.
„ჩვენი ახალი კომუნიკაცია განსაზღვრავს უფრო მჭიდრო თანამშრომლობის შესაძლებლობებს ვაჭრობის, ტექნოლოგიების, უსაფრთხოებისა და თავდაცვის, ასევე კლიმატის საკითხებში. თავისუფალი ვაჭრობის შეთანხმება, ინვესტიციების დაცვის შეთანხმება და ყოვლისმომცველი საჰაერო ტრანსპორტის შეთანხმება შეიძლება, ამ პარტნიორობის საყრდენები იყოს. ინდოეთის მონაწილეობა რუსეთის სამხედრო წვრთნებში და რუსული ნავთობის შეძენა ხელს უშლის უფრო მჭიდრო კავშირებს. რადგან საბოლოო ჯამში, ჩვენი პარტნიორობა არა მხოლოდ ვაჭრობას, არამედ წესებზე დაფუძნებული საერთაშორისო წესრიგის დაცვასაც ეხება. ჩვენი მოლაპარაკებები ამ გამოწვევებს განიხილავს, რათა 2026 წლის დასაწყისში ევროკავშირ-ინდოეთის სამიტზე ერთობლივი საგზაო რუკა იყოს მიღებული. ევროკავშირის კომისრების კოლეგიის შეთანხმება იყო ინდოეთთან კავშირების გაღრმავება, რათა მათ რუსეთის მხარეს გადასვლისკენ არ ვუბიძგოთ“, – განაცხადა ევროკავშირის საგარეო ქმედებათა სამსახურის ხელმძღვანელმა, კაია კალასმა.
0
0
