გივი ზალდასტანიშვილის სახელობის ამერიკულ აკადემიაში რობოტიკის First Global-ის ეროვნული საკვალიფიკაციო ტურნირი გაიმართა. მასში მონაწილეობა მიიღო სხვადასხვა სკოლის 15-მა გუნდმა, რომელშიც 40-ზე მეტი მოსწავლე იყო გაერთიანებული.

დაძაბულ ფინალში, ორმა, პირველ ადგილზე გასულმა გუნდმა - ნია ჯანაშიას, ნატალია ნოზაძის, გელა კირვალიძის, თემიკო მაჭავარიანისა და ალექსანდრე თვალაძის შემადგენლობით, ათენში,  First Global -ის საერთაშორისო ტურნირზე მონაწილეობის საგზური მოიპოვა; მესამე ადგილზე გასული გუნდი კი თურქეთის საერთაშორისო შეჯიბრში იასპარეზებს.

მოსწავლეებმა შექმნეს და ააწყვეს  LEGO-ს რობოტები, რომელთაც კონკრეტული დავალებები უნდა შეესრულებინათ.

შეჯიბრში, რომელიც წელს ათენში ჩატარდება, 180 ქვეყანა, მათ შორის, საქართველოც მიიღებს მონაწილეობას.

აღსანიშნავია, რომ საქართველოს სახელით რობოტიკის გუნდი 2018 წელს უკვე მეორედ მონაწილეობდა FIRST Global-ის შეჯიბრში. 

2017 წელს, ქართველმა მოსწავლეებმა 160-ზე მეტ ქვეყანას შორის, მე-14 ადგილი დაიკავეს. 

2018 წელს, შეჯიბრი მექსიკაში ჩატარდა და მასში 180-ზე მეტი ქვეყნის გუნდი იღებდა მონაწილეობას.

ოლიმპიადის თემა ენერგოეფექტურობა იყო. ბავშვებს დაევალათ აეწყოთ რობოტი, რომელიც გამოიმუშავებდა ელექტროენერგიას სხვადასხვა ალტერნატიული ენერგიის წყაროებით, როგორიცაა მზის ბატარეა, ქარის წისქვილი და ა.შ. 

საქართველოს გუნდმა ამ შეჯიბრზე 186 ქვეყანას შორის, მესამე ადგილი დაიკავა, მიუხედავად იმისა, რომ რობოტი, რომელზეც სამი თვის განმავლობაში მუშაობდნენ, ავიაკომპანიამ გზაში დაკარგა და მათ ადგილზევე მოუწიათ ახალი რობოტის აწყობა სულ რაღაც, 10 საათში.

როგორც პროექტის ორგანიზატორებმა  spnews-ს განუცხადეს,  მსგავსი ტიპის პროექტებში ჩართულობა უმნიშვნელოვანესია მომავალი თაობის წახალისებისთვის, რათა ისინი კიდევ უფრო აქტიურად ჩაერთონ STEM-ის დარგში და მეტ წარმატებას მიაღწიონ ამ სფეროში. 

კონკურსის მონაწილეები თავიანთ გამოცდილებას სამომავლოდ,  თანატოლებსაც გაუზიარებენ და მათაც მოუწოდებენ მიიღონ მონაწილეობა სხვადასხვა პროექტებსა თუ ოლიმპიადებში, რათა კიდევ უფრო ფართოთ გააცნონ მსოფლიოს საქართველოს სახელი.

First Global არის რობოტიკის საერთაშორისო შეჯიბრი, რომელშიც ყოველწლიურად 160-ზე მეტი ქვეყანა იღებს მონაწილეობას. შეჯიბრის მიზანია ახალგაზრდებს გაუღვივოს ინტერესი STEM-ის დარგში.

FIRST Global ცდილობს ახალგაზრდები აქციოს ლიდერებად ტექნოლოგიისა და მეცნიერების სფეროში და ამავდროულად, აძლევს მათ საშუალებას გამოხატონ თავიანთი ინოვაციური იდეები, გამოიმუშავონ კოლაბორაციის უნარი, მიმართონ საკუთარი ყურადღება მსოფლიოში არსებული ყველაზე მნიშვნელოვანი პრობლემებისკენ და მოიფიქრონ გამოსავალი მათ გადასაჭრელად.