ევროკავშირი დათანხმდა, განუსაზღვრელი ვადით გაყინოს რუსეთის ცენტრალური ბანკის აქტივები, რომლებიც ევროპაში ინახება. ინფორმაციას ამის შესახებ სააგენტო Reuters-ი ავრცელებს.

„ევროკავშირს სურს, რომ უკრაინა იყოს დაფინანსებული და განაგრძოს ბრძოლა, რადგან რუსეთის უკრაინაში შეჭრა მის საკუთარ უსაფრთხოებას უქმნის საფრთხეს. ამისათვის, ევროკავშირის წევრი ქვეყნები მიზნად ისახავენ გამოიყენონ რუსეთის ზოგიერთი სუვერენული აქტივი, რომელიც მათ გაყინეს მოსკოვის მიერ 2022 წელს უკრაინაში შეჭრის შემდეგ“, - წერს Reuters-ი.

პირველი დიდი ნაბიჯი, რომელზეც ევროკავშირის მთავრობები პარასკევს შეთანხმდნენ, არის 210 მილიარდი ევროს ღირებულების რუსეთის სუვერენული აქტივების გაყინვა იმდენ ხანს, რამდენიც საჭირო იქნება, ნაცვლად იმისა, რომ ყოველ ექვს თვეში ხმა მისცენ აქტივების გაყინვის ვადის გაგრძელებას.

აქტივების განუსაზღვრელი ვადით გაყინვა მიზნად ისახავს დაეხმაროს ბელგიის დარწმუნებაში, რომ მხარი დაუჭიროს ევროკავშირის გეგმას, გამოიყენოს გაყინული რუსული ნაღდი ფული, რათა უკრაინას მიეცეს 165 მილიარდ ევრომდე სესხი, მისი სამხედრო და სამოქალაქო ბიუჯეტის საჭიროებების დასაფარად 2026 და 2027 წლებში.