დღეს, 2 ოქტომბერს, საზოგადოებრივ-პოლიტიკურმა რადიო „სივრცემ“ საინფორმაციო მაუწყებლობა დაიწყო.

როგორც რადიო „სივრცის“ გენერალურმა დირექტორმა ეკა ვეფხვაძემ განაცხადა, საინფორმაციო გამოშვებების გარდა, მსმენელი თემატურ მიმართულებებს და ბევრ საინტერესო გადაცემას მოისმენს. 

“რადიო ”სივრცის"  მიზანია, რეალურ სივრცეში, ობიექტურად და ოპერატიულად მიაწოდოს მსმენელს მისთვის საჭირო ინფორმაცია. საინფორმაციო გამოშვების გარდა, ჩვენ ვგეგმავთ, თემატურ მიმართულებებს – დილის გადაცემას, ეკონომიკური და ბიზნესსიახლეების შესახებ საინფორმაციო-ანალიტიკას, კულტურულ-შემეცნებით პროგრამებს და სხვა. რადიო „სივრცე“ უკვე 4 თვეა მაუწყებლობს FM სიხშირეზე და მსმენელი კარგად იცნობს მას მისთვის საყვარელი თანამედროვე მუსიკით და 80-90-იანი წლების ჰიტებით. სულ მალე,  ეთერს  მრავალფეროვანი და საინტერესო გადაცემები შეემატება. ვიმედოვნებ, რომ ჩვენი მსმენელების მოლოდინს გავამართლებთ და ჩვენს გუნდთან ერთად, მაღალპროფესიულ პროდუქტს შევთავაზებთ" - განაცხადა ეკა ვეფხვაძემ.

რადიოეთერში ახალი ამბების მოსმენა შესაძლებელია საათში ერთხელ ტალღაზე FM 98.5, ონლაინრეჟიმში კი- ინტერნეტმისამართზე spnews.io.

რადიო “სივრცის” საინფორმაციო გამოშვებები მზადდება საინფორმაციო სააგენტო “სფეისნიუსის” ინფორმაციების მიხედვით.