ნეპალის არმიის ბოლო განცხადებაში ნათქვამია, რომ კომენდანტის საათის შესახებ ბრძანებები ძალაში დარჩება 10 სექტემბერს და ძალაში შევა ხუთშაბათს, 11 სექტემბერს, დილის 6 საათიდან საღამოს 6 საათამდე.

„ამჟამინდელ არახელსაყრელ ვითარებაში, ნეპალის არმია ყველა მოქალაქეს თანამშრომლობისკენ მოუწოდებს ქვეყანაში მშვიდობისა და უსაფრთხოების შენარჩუნების ვალდებულების შესრულების მიზნით. არმია ღრმა მწუხარებას გამოთქვამს საპროტესტო აქციების დროს ადამიანების დაღუპვისა და მატერიალური ზარალის გამო. ასევე მოვუწოდებთ ყველას, ითანამშრომლონ დემონსტრაციების საფარქვეშ განხორციელებული კრიმინალური საქმიანობის კონტროლის მიზნით.

საპროტესტო აქციების დროსაც კი, ზოგიერთი კანონდაუმორჩილებელი პირი და ჯგუფი მონაწილეობდა შენობისთვის ცეცხლის წაკიდებაში, ძარცვაში, საჯარო და კერძო ქონებისადმი ვანდალურად მოპყრობაში, შენობაში იძულებით შეღწევაში, ფიზიკური პირების წინააღმდეგ ძალადობრივ თავდასხმებში, გაუპატიურების მცდელობებსა და მსგავს ქმედებებში. ასეთი ინციდენტების შესაძლებლობის გათვალისწინებით, ქვეყანაში მშვიდობისა და უსაფრთხოების უზრუნველყოფის მიზნით, უკვე გაიცა საგანგებო ბრძანება“, - ნათქვამია განცხადებაში. 

ნეპალში, სოციალური მედია პლატფორმების ხანმოკლე დაბლოკვისა და კორუფციის წინააღმდეგ საპროტესტო აქციები მესამე დღეა გრძელდება. აქტივისტებმა სამთავრობო შენობებსა და პოლიტიკოსების სახლებს ცეცხლი წაუკიდეს. ისინი თავს დაესხნენ ზოგიერთ ლიდერს, მათ შორის ჰიმალაის ყოფილ პრემიერ-მინისტრ შერ ბაჰადურ დეუბას. პრემიერ-მინისტრმა კ.პ. შარმა ოლიმ თანამდებობა დატოვა ქვეყნის პოლიტიკური ელიტის მიმართ მზარდი კრიტიკის ფონზე. პრეზიდენტმა ოლი დროებითი მთავრობის ხელმძღვანელად დანიშნა ახალი მთავრობის ჩამოყალიბებამდე.