ქუთაისის საერთაშორისო აეროპორტში კომპანია Wizz Air ოპერირების დაწყებიდან დღემდე, 6 მილიონ მგზავრს მოემსახურა. მეექვსე მემილიონე მგზავრს აეროპორტის ადმინისტრაციამ და კომპანიამ სიმბოლური დახვედრა მოუწყვეს.

იღბლიანი მგზავრი 19 წლის ანა მაჭავარიანია, ის დედასთან ერთად ვენიდან მოფრინავდა და აღნიშნულის შესახებ ბორტზე შეიტყო. მას 200 ევროიანი სამგზავრო ვაუჩერი და სიმბოლურად აეროპორტის ბრინჯაოს მაკეტი გადაეცა.

კომპანია Wizz Air-ი ქუთაისის აეროპორტში 2012 წლიდან ოპერირებს და 24 ქვეყანაში დაფრინავს. აღნიშნული მიღწევა, ასახავს არა მხოლოდ კომპანიის მიერ ხელმისაწვდომი და მოსახერხებელი მგზავრობის უზრუნველყოფას, არამედ ხაზს უსვამს ქუთაისის აეროპორტის, როგორც უმნიშვნელოვანესი რეგიონული სატრანსპორტო ჰაბის გამორჩეულ ზრდასა და ცნობადობას.