რუსეთის პრეზიდენტმა ვლადიმირ პუტინმა ორშაბათს ხელი მოაწერა განკარგულებას ბელარუსის, მოლდოვასა და ყაზახეთის მოქალაქეებისთვის რუსეთის მოქალაქეობის მიღების გამარტივების შესახებ.

ახლა მათ აღარ დასჭირდებათ იმის მტკიცებულება, რომ ბინადრობის მოწმობის გაცემის შემდეგ, მუდმივად ცხოვრობენ ქვეყანაში; საჭირო არ არის არც რუსეთის ისტორიისა და სახელმწიფოებრიობის საფუძვლების ცოდნაზე გამოცდის ჩაბარება. ბელარუსებს ასევე აღარ სჭირდებათ რუსული ენის ცოდნის დადასტურება. ყაზახებისა და მოლდოველებისთვის რუსული გამოცდის ჩაბარების აუცილებლობა რჩება.

მაისში, „იზვესტიამ“ დაწერა, რომ 2023 წლის დასაწყისის ვითარების მიხედვით, დაახლოებით სამი მილიონი უცხოელი მუშაობდა რუსეთში. „ვედომოსტი“ განმარტავს, რომ მათი უმრავლესობა დსთ-ს ქვეყნების მოქალაქეა.