უნგრეთის საგარეო საქმეთა მინისტრის, პიტერ სიიარტოს განცხადებით, ოფიციალური ბუდაპეშტი დამოუკიდებელ პოლიტიკას აწარმოებს და ქვეყანას არ სჭირდება სხვა ქვეყნისგან ნებართვა თუ მითითება საგარეო პოლიტიკის წარმოების შესახებ.

მისივე თქმით, უნგრეთი საკუთარ საგარეო პოლიტიკას ეროვნული ინტერესების მიხედვით წარმართავს.

„მოსკოვში გუშინდელი შეხვედრის შესახებ ომის მომხრე ევროპელი პოლიტიკოსების იმედგაცრუებული განცხადებების წაკითხვის შემდეგ მე მჯერა, რომ სერიოზულ გაუგებრობას განმარტება სჭირდება.

ჩვენ, უნგრელებს, არ გვჭირდება ბრიუსელიდან, ბერლინიდან ან სხვა ნებისმიერი ადგილიდან ნებართვა ან მანდატი რაიმე საგარეო მოლაპარაკებებისთვის. ჩვენ ვახორციელებთ სუვერენულ საგარეო პოლიტიკას და ჩვენი გადაწყვეტილებები განისაზღვრება ჩვენი ეროვნული ინტერესებით, მოსწონთ ეს ბრიუსელში თუ არა“, – წერს სიიარტო.

ცნობისთვის, 28 ნოემბერს უნგრეთის პრემიერ-მინისტრი ვიქტორ ორბანი რუსეთში გაემგზავრა, სადაც ვლადიმერ პუტინს შეხვდა. შეხვედრისას ორბანმა განაცხადა, რომ სურს დეტალური მოლაპარაკებები რუსული ნავთობისა და გაზის მიწოდებაზე, რადგან ისინი უნგრეთის ენერგეტიკული უსაფრთხოებისთვის გადამწყვეტია. რუსეთის პრეზიდენტმა კი ორბანს უთხრა, რომ კვლავაც მიესალმება სამშვიდობო შეხვედრის ბუდაპეშტში გამართვის იდეას და მადლობა გადაუხადა მას მასპინძლობის შეთავაზებისთვის.