დამფუძნებელი კრების თავმჯდომარის მოადგილეს, ალექსანდრე ლომთათიძეს ხვალ დიდუბის პანთეონში დაკრძალავენ, ამის შესახებ საგარეო საქმეთა მინისტრმა, ილია დარჩიაშვილმა განაცხადა. მანამდე კი, 28 მაისს, 12:00 საათიდან სამოქალაქო პანაშვიდი გაიმართება.

ცნობილი ქართველი პოლიტიკური, სახელმწიფო და საზოგადო მოღვაწის, ალექსანდრე ლომთათიძის ნეშტი, ქართული დიასპორის დღეების ფარგლებში, უზბეკეთის რესპუბლიკაში საქართველოს საელჩოს ძალისხმევით, საქართველოში 26 მაისს ჩამოასვენეს.

როგორც მინისტრმა აღნიშნა, ალექსანდრე ლომთათიძე მონაწილეობდა საქართველოს ეკლესიის ავტოკეფალიის აღდგენის საქმეში და გახლდათ ერთ-ერთი ხელმომწერი საქართველოს პირველი დემოკრატიული რესპუბლიკის დამოუკიდებლობის აქტზე.

რამდენიმე დღის წინ, საქართველოს პირველი პარლამენტის ოთხი ხელმძღვანელი პირი საქართველოს პარლამენტის თავისუფლების ორდენით დაჯილდოვდება. დამფუძნებელი კრების თავმჯდომარე ნიკოლოზ-კარლო ჩხეიძისა და თავმჯდომარის მოადგილეების, ალექსანდრე ლომთათიძის, ექვთიმე თაყაიშვილისა და სვიმონ მდივნისათვის ჯილდოს მინიჭების გადაწყვეტილება პარლამენტის ბიუროს სხდომაზე მიიღეს.

„რამდენიმე წელი მიმდინარეობდა მუშაობა, რომ საქართველოში გადმოგვესვენებინა დამფუძნებელი კრების თავმჯდომარის პირველი მოადგილე ალექსანდრე ლომთათიძე. ეს გახლავთ ადამიანი, რომელიც უპირველეს ყოვლისა, იყო პირველი პარლამენტის თავმჯდომარის პირველი მოადგილე. გარდა ამისა, აღსანიშნავია, რომ მაშინდელი თავმჯდომარე – ნიკოლოზ, კარლო ჩხეიძე არჩეულ იქნა თავმჯდომარედ დაუსწრებლად. ვინაიდან საქართველოს დამოუკიდებლობასთან დაკავშირებით, ასე ვთქვათ, დიპლომატიური მისიით  იმყოფებოდა ევროპაში და მაშინდელი თავმჯდომარე დაბრუნდა 1920 წლის ბოლოს, იმ პერიოდში, ფაქტობრივად, ალექსანდრე ლომთათიძე ხელმძღვანელობდა პარლამენტს, როგორც პარლამენტის თავმჯდომარის პირველი მოადგილე.

საბჭოთა ოკუპაციის შემდეგ, როდესაც საქართველოს მთავრობის დიდმა ნაწილმა დატოვა საქართველო, ის დარჩა საქართველოში, მათ შორის ჩართული იყო ანტისაოკუპაციო მოძრაობებში, რის გამოც 1921 წელსვე დააკავეს. შემდეგ გადაასახლეს, ჯერ მარიის რესპუბლიკაში, შემდეგ ჩუვაშეთში იყო, ბოლოს, 1924 წელს უზბეკეთში, ტაშკენტში გარდაიცვალა ციხეში. 

მინდა, განსაკუთრებული მადლობა გადავუხადო უზბეკეთში საქართველოს ელჩს, ზურაბ აბდუშელიშვილს, რომელმაც შეძლო და მოიძია მისი საფლავი ტაშკენტში, ქრისტიანულ სასაფლაოზე. სრულად უზრუნველყო, შესაბამისი დოკუმენტაცია, ნებართვები გაცემულიყო. იყო გადმოსვენების ინიციატორიც. ამიტომ, მინდა, მას და საგარეო საქმეთა სამინისტროს ამისთვის მადლობა გადავუხადო. განსაკუთრებით მინდა, მადლობა გადავუხადო გია ვოლსკის, რომელიც პარლამენტის მხრიდან ამ საკითხის თანაორგანიზატორი, თანაინიციატორი და, ასე ვთქვათ, განმახორციელებელი იყო. საკითხი რამდენიმე ხნის წინ იყო გარკვეული, თუმცა პანდემიამ შეაჩერა გადმოსვენების პროცესი. ლომთათიძის ნეშტს დაასვენებენ სამების ტაძარში და 28 მაისს, 12:00 საათზე იქნება პანაშვიდი, რის შემდეგაც დიდუბის სასაფლაოზე გადავასვენებთ. ალექსანდრე ლომთათიძე თავისი შვილის გვერდით შესაბამისი პატივით დასაფლავდება“, – განაცხადა შალვა პაპუაშვილმა 25 მაისს ბიუროს სხდომაზე.

ცნობისთვის, ალექსანდრე ლომთათიძე 1882 წლის  25 მაისს ოზურგეთში დაიბადა, 1924 წელს კი  ტაშკენტის ციხეში გარდაიცვალა.