საგამოძიებო კომისია მუშაობას განაგრძობს. დღეს კომისიის წევრები შეიკრიბებიან და „ნაციონალური მოძრაობის“ ქმედებებზე რამდენიმე ადამიანს მოუსმენენ. სხდომა პირდაპირ ეთერში არ გადაიცემა.

კომისია გამოსაკითხ პირებს 5 აგვისტომდე სამ-სამ კაციანი შემადგენლობით მოუსმენს.

ბოლო სხდომა 5 აგვისტოს გაიმართება. შემდეგ კი მომზადდება დადგენილება, რომელსაც პარლამენტი საშემოდგომო სესიაზე განიხილავს.

პარლამენტის დროებითი საგამოძიებო კომისია 2003–2012 წლებში მოქმედი რეჟიმის, ამ რეჟიმის პოლიტიკური თანამდებობის პირებისა და პოლიტიკურ პარტიებში გაერთიანებული მოქმედი და ყოფილი თანამდებობის პირების 2003 წლიდან დღემდე საქმიანობას სწავლობს.