აშშ-ში ღორის გენმოდიფიცირებული თირკმელი ცოცხალ პაციენტს პირველად გადაუნერგეს. ოპერაცია მასაჩუსეტსის საავადმყოფოში ჩატარდა და ექიმების გუნდის ცნობით, ამ მიღწევამ მილიონობით ადამიანს შესაძლოა სიცოცხლე გაუხანგრძლივოს.

გენმოდიფიცირებული ღორის თირკმელი 62 წლის კაცს გადაუნერგეს, რომელსაც თირკმლის ბოლო სტადიის დაავადება აქვს. ექიმების თქმით, ღორის თირკმელი გენეტიკურად შეცვალეს, რათა მოეცილებინათ ღორის საზიანო გენები და დაემატებინათ ადამიანის ზოგიერთი საჭირო გენი.

საავადმყოფოს წარმომადგენლის ცნობით, 62 წლის პაციენტი თავს კარგად გრძნობს და ამჟამად პოსტოპერაციულ პერიოდს მასაჩუსეტსის საავადმყოფოში გადის. როგორც ცნობილია, მხოლოდ მასაჩუსეტსის ამ საავადმყოფოში თირკმლის ტრანსპლანტის მომლოდინეთა რიცხვი 1 400-ს გადაცდა.