13 წლის განმავლობაში ოპოზიცია დადიოდა მოჯადოებულ წრეზე და ამოცანებს უსახავდა თავის თავს, რომელსაც თვითონვე ვერ ასრულებდა, არარეალისტურ ამოცანებს სახავდა, – ამის შესახებ პარტია „ფედერალისტების“ ერთ-ერთმა დამფუძნებელმა, თამარ ჩერგოლეიშვილმა საქართველოს პირველი არხის გადაცემა „აქტუალური თემა მაკა ცინცაძესთან ერთად“ სტუმრობისას განაცხადა.
"ამ პლატფორმის ამოცანა ის კი არ არის, რაღაც ერთიანობას მიაღწიოს? ის ერთიანობა რისთვის გინდა, რომ მივაღწიოთ პროტესტის ამოცანებს, ახალ არჩევნებს რომ მივაღწიოთ, ანუ ძალაუფლების მშვიდობიან გადაბარებას რომ მივაღწიოთ. ამისთვის არის ეს პლატფორმა, თორემ იმიტომ კი არა, რომ ერთიანები ვიყოთ“, – განაცხადა ჩერგოლეიშვილმა.
მისი თქმით, სალომე ზურაბიშვილის პროცესის დადებითი მხარეა, რომ არავის უშლის, ვისაც უკეთესი გეგმა აქვს, ის აკეთოს.
ინტერვიუ თამარ ჩერგოლეიშვილთან #აქტუალურითემა
მსგავსი: ინტერვიუ თამარ ჩერგოლეიშვილთან #აქტუალურითემა
"პაატა ბურჭულაძეს თუ შეუძლია, დაჯდეს რუსთაველზე, აღარ ადგეს და ამით მიაღწიოს პოლიტპატიმრების გათავისუფლებას, გამიხარდება, ტაშს დავუკრავ, როცა მიზანს მიაღწევს და გააკეთოს ეს ყველაფერი. არავის არ უშლის ეს ფორმატი, რომ ეს აკეთოს“, – განაცხადა თამარ ჩერგოლეიშვილმა.
გადაცემის წამყვანის შეკითხვაზე, რამდენად სწორად მართავს ოპოზიცია საზოგადოების მოლოდინებს, რამდენად იყო აქციის მონაწილეების დაკვეთა ის, რაც 31 მარტს მოისმინეს მაგალითად, ყოფილი პრეზიდენტისგან და რატომ გაჩნდა ერთგვარი იმედგაცრუების შეგრძნება იგივე პოლიტიკურ აქტორებს შორის, თამარ ჩერგოლეიშვილმა აღნიშნა, რომ ირღვევა წრე, რომელზეც ოპოზიციის წარმომადგენლები დადიოდნენ, რასაც მიჩვეული იყვნენ და ამას ბუნებრივად მოჰყვება რყევები და უკმაყოფილება.
როგორც თამარ ჩერგოლეიშვილმა აღნიშნა, ეს პლატფორმა არის ყოველდღიური რუტინული მუშაობა.
"აქ შენ ვერ გექნება რაღაც ხმამაღალი განცხადებები, რომ უნდა გამოვიტაცოთ „ვივამედიდან“ ჩვენი მზეთუნახავი. ანუ, ამისთვის არ არის ეს პლატფორმა შექმნილი, რომ მზეთუნახავები გამოვიტაცოთ საიდანღაც. შესაბამისად, იმის გამო, რომ აქამდე ყოველთვის ეგ იყო ხოლმე მთავარი თემა, შეუგუებლობა ხდება ახალ ფორმატთან, მაგრამ თავისთავად ეს შეუგუებლობაც ხომ ძალიან კარგია, აჩვენებს, რომ რაღაც ახალი იბადება“, – განაცხადა ჩერგოლეიშვილმა.
პარტია „ფედერალისტების“ ერთ-ერთმა დამფუძნებელმა ასევე თქვა, რომ ხელისუფლება ცდილობს, ყველა ერთ ქვაბში ჩაყაროს, ვითომ ყველა „ნაციონალური მოძრაობაა“.
"სალომე ზურაბიშვილი ზუსტად ამას არღვევს. ამას გარდა რა, ბადრი ჯაფარიძეს და მამუკა ხაზარაძეს, რომელთა მიმართ ბუნებრივია, სოლიდარული ვარ, რატომ ეძახის ამ „ნაციონალური მოძრაობის“ გამოძიებაზე? კომიკურია ხომ? ბოკერია-სააკაშვილის სისხლიანი რეჟიმი უნდა გასამართლდესო და ბოკერია ზის სახლში, ცნობილი მიმი რომ არის ნარკოზის, რომ ზის ასე მოწყენილი, ასე ზის, ელოდება, რომ დაუძახებენ კომისიაზე, მაგრამ ამას არავინ არ ეძახის“, – განაცხადა ჩერგოლეიშვილმა.
მაკა ცინცაძის შეკითხვაზე, მივა თუ არა გიგა ბოკერია კომისიაზე დაბარების შემთხვევაში, თამარ ჩერგოლეიშვილმა განაცხადა, რომ ცხადია, არ მივა.
"ცხადია, არ მივა და დასცინებს, მაგრამ ფაქტია, ამას არ ეძახიან და ეძახიან ხაზარაძეს და ჯაფარიძეს“, – განაცხადა ჩერგოლეიშვილმა.
0
0
