ნიუ იორკში აშშ-ის პრეზიდენტის სპეციალური წარმომადგენლის, სტივ უიტკოფისა და უკრაინის პრეზიდენტის ოფისის ხელმძღვანელის, ანდრეი ერმაკის შეხვედრა გაიმართა.
შეხვედრას ასევე ესწრებოდა უკრაინის საგარეო საქმეთა მინისტრის პირველი მოადგილე სერგეი კისლიცა.
როგორც ერმაკმა სოციალურ ქსელში დაწერა, მთავარი პრიორიტეტია რეალური დიპლომატიის წინ წაწევა და ვაშინგტონის სამიტზე მიღწეული ყველა შეთანხმების შესრულების უზრუნველყოფა.
„ჩვენ ვახდენთ ჩვენი ძალისხმევის კოორდინაციას. შეხვედრის დაწყებისას სტივ ვიტკოფს მივაწოდე ინფორმაცია ომის დანაშაულების შესახებ, რომლებსაც რუსეთი ყოველდღიურად სჩადის უკრაინაში ჩვენი ქალაქებისა და მოქალაქეების წინააღმდეგ. კერძოდ, ვისაუბრე კიევზე მასირებულ თავდასხმაზე რაკეტებითა და დრონებით, რომელმაც 23 ადამიანის, მათ შორის, ოთხი ბავშვის სიცოცხლე შეიწირა. სამწუხაროდ, რუსეთი ომის დასასრულებლად არაფერს ასრულებს და აშკარად აჭიანურებს საომარ მოქმედებებს. უკრაინა მხარს უჭერს პრეზიდენტ ტრამპის, ისევე, როგორც ყველა პარტნიორის მტკიცე გადაწყვეტილებას, მიაღწიოს ხანგრძლივ მშვიდობას, რაც შეიძლება მალე. უკრაინა მიესალმება შეერთებული შტატების მიერ წარდგენილ ყველა სამშვიდობო ინიციატივას, მაგრამ, სამწუხაროდ, ყველა მათგანს რუსეთი აფერხებს“, – დაწერა ერმაკმა.
ზელენსკის ოფისის ხელმძღვანელის თქმით, უკრაინა ღიაა ლიდერების დონეზე პირდაპირი მოლაპარაკებებისთვის და მზად არის, განიხილოს საკითხების ფართო სპექტრი.
„ჩვენ გვჯერა, რომ საჭიროა გლობალური ზეწოლა იმის უზრუნველსაყოფად, რომ რუსეთი ნამდვილად მზად იყოს მშვიდობისკენ სწრაფვისთვის, კერძოდ, ამ მიზნით ლიდერების კრიტიკულად მნიშვნელოვანი შეხვედრების ჩასატარებლად“, – დაწერა ერმაკმა და აღნიშნა, რომ სტივ უიტკოფი უახლოეს მომავალში უკრაინაში ვიზიტით მიიწვია.
0
0
