აშშ-ის პრეზიდენტი დონალდ ტრამპი კონგრესის მიერ უკვე დამტკიცებული უცხოური დახმარებისა და სამშვიდობო მისიებისთვის გამოყოფილ ხუთ მილიარდამდე დოლარის გაუქმებას აპირებს, – ამის შესახებ ინფორმაციას „ნიუ იორკ პოსტი“ ავრცელებს. 

ე.წ. Pocket rescission-ი, რაც ფისკალური წლის მიწურულისთვის კონგრესისგან დაფინანსების გაუქმების მოთხოვნის პროცედურას გულისხმობს, ბოლოს 1977 წელს იქნა გამოყენებული.

გამოცემის ცნობით, დონალდ ტრამპმა კონგრესს უკვე დამტკიცებული თანხების გაუქმების მოთხოვნით 28 აგვისტოს მიმართა.

თანხები, რომელთა გაწვევაც ტრამპს სურს, განკუთვნილი იყო არაკომერციული ორგანიზაციების, უცხოური მთავრობებისთვის და მიმდინარე წელს თეთრი სახლის მენეჯმენტისა და ბიუჯეტის ოფისის მიერ იქნა დაპაუზებული. ამის შემდეგაც სამართლებრივ დავებში აღმოჩნდა, როდესაც გლობალურმა ჯანდაცვის საბჭომ სასამართლოში სარჩელი შეიტანა. კოლუმბიის ოლქის სააპელაციო სასამართლომ აღნიშნულ საქმეზე სასამართლო აკრძალვა გააუქმა, რითაც პრეზიდენტ ტრამპს შესაძლებლობა მიეცა, ახლა კონგრესს მოსთხოვოს ამ თანხების გაუქმება.

აღნიშნული თანხა მოიცავს 3.2 მილიარდ დოლარს, რომელიც USAID-ის განვითარების მიზნებისთვის იყო გამოყოფილი – 322 მილიონი დოლარი USAID-ისა და სახელმწიფოს დეპარტამენტის დემოკრატიის ფონდისგან, 521 მილიონი არის სახელმწიფო დეპარტამენტის კონტრიბუციები საერთაშორისო ორგანიზაციებისთვის, 393 მილიონი სახელმწიფო დეპარტამენტის კონტრიბუციები სამშვიდობო საქმიანობებისთვის, ხოლო 445 მილიონი გამოყოფილი იყო ცალკეული სამშვიდობო ოპერაციებისთვის.

ტრამპის ადმინისტრაციამ გამოყო ხარჯები, რომლებიც სავარაუდოდ არამიზნობრივად იხარჯებოდა, მათ შორის 24.6 მილიონი კლიმატის მედეგობისთვის ჰონდურასში, 2.7 მილიონი სამხრეთ აფრიკის დემოკრატიული ფონდისთვის, ხოლო 3.9 მილიონი დასავლეთ ბალკანეთში ლგბტ საზოგადოებას შორის დემოკრატიის წახალისებისთვის. სტატიაში აღნიშნულია, რომ ამ თანხების გაუქმება არ აისახება აშშ-ის მხარდაჭერაზე, რომელიც მრავალეროვნული შეიარაღებული ძალებისა და ისრაელ-ეგვიპტის საზღვარზე სადამკვირვებლო სამშვიდობო მისიებისთვის იყო გამოყოფილი. აღსანიშნავია, რომ „გაუქმება“ მწვავე დებატების საგანია, თუმცა სასამართლო პრეცედენტები მცირეა. კონტროლის პალატა ამ პრაქტიკას უკანონოდ მიიჩნევს, თუმცა ტრამპის ადმინისტრაცია მათ არ ეთანხმება.