საქართველოს გარემოს დაცვისა და სოფლის მეურნეობის მინისტრის პირველმა მოადგილემ, ნინო თანდილაშვილმა, საბერძნეთის დედაქალაქ ათენში გამართულ ენერგეტიკული გაერთიანების მინისტერიალში მიიღო მონაწილეობა. მინისტრთა საბჭოს არაფორმალური შეხვედრა ენერგეტიკული გაერთიანების 20 წლის იუბილეს მიეძღვნა.
წლევანდელ მინისტერიალში საქართველო ენერგეტიკული გაერთიანების თავმჯდომარე ქვეყნის სტატუსით მონაწილეობდა, რომელიც ქვეყანას 2025 წლის დასაწყისში, 1 წლის ვადით მიენიჭა.
ნინო თანდილაშვილი მინისტერიალზე მოხსენებით წარსდგა და გარემოს დაცვისა და სოფლის მეურნეობის სამინისტროს მიერ კლიმატის ცვლილებების წინააღმდეგ გადადგმულ ნაბიჯებზე, ასევე, ევროკავშირთან ასოცირების შეთანხმებისა და ენერგეტიკული გაერთიანების დამფუძნებელი შეთანხმებით აღებული ვალდებულებების შესრულებაზე ისაუბრა.
„საქართველო სათბურის გაზების ემისიებით ვაჭრობის ეროვნული სისტემის ჩამოყალიბებაზე მუშაობს. გამომდინარე ევროკავშირის წევრობის კანდიდატი ქვეყნის სტატუსიდან, მიზანშეწონილია, ეტაპობრივი ინტეგრირება ევროკავშირის ემისიებით ვაჭრობის სისტემაში. ამ პროცესის დაწყებამდე, საქართველო გამოხატავს მზადყოფნას, ითანამშრომლოს ევროკომისიასთან და ენერგეტიკული გაერთიანების სამდივნოსთან, რათა ერთობლივად შეფასდეს გარდამავალი პერიოდისთვის ეროვნული სისტემის დანერგვის მიზანშეწონილობა“, - განაცხადა ნინო თანდილაშვილმა.
გარემოს დაცვისა და სოფლის მეურნეობის მინისტრის პირველმა მოადგილემ ხაზი გაუსვა ნახშირბადის საზღვრის კორექტირების მექანიზმთან (CBAM) დაკავშირებულ საკითხებს, რომელიც ევროკავშირში 2026 წლის დასაწყისში ამოქმედდება. მისი თქმით, აუცილებელია დეტალური ინფორმაციის გაზიარება ევროკავშირის მხრიდან, რათა შესაბამისი ქართული კომპანიები, რომლებიც ევროკავშირის ბაზარზე აწარმოებენ ექსპორტს, წინასწარ იყვნენ მზად ახალი რეგულაციებისთვის.
მინისტერიალში მონაწილეობა მიიღეს ენერგეტიკული გაერთიანების დირექტორმა, ევროკომისარმა ენერგეტიკის საკითხებში, ევროკომისიის გენერალური დირექტორატების წარმომადგენლებმა, ბალკანეთის ქვეყნების ენერგეტიკისა და გარემოს დაცვის მინისტრებმა და სხვა მაღალი რანგის ოფიციალურმა პირებმა. საქართველოს სახელით, ნინო თანდილაშვილთან ერთად, მინისტერიალში მონაწილეობდა საქართველოს ეკონომიკისა და მდგრადი განვითარების მინისტრის მოადგილე გენადი არველაძე.
0
0
