ნიდერლანდების უზენაესმა სასამართლომ ძალაში დატოვა ქვედა ინსტანციების სასამართლოების გადაწყვეტილებები უკრაინისთვის „სკვითური ოქროს“ დაბრუნების შესახებ.

სასამართლოს საბოლოო გადაწყვეტილებით, ალარდ პირსონის მუზეუმმა არქეოლოგიური ძვირფასეულობები უკრაინის სახელმწიფოს უნდა დაუბრუნოს და არა ყირიმის მუზეუმებს.

„სკვითური ოქრო“ ამსტერდამში თითქმის 10 წელი რჩებოდა. ამსტერდამში მდებარე ალარდ პიკსონის მუზეუმმა ყირიმის ოთხი მუზეუმიდან ექსპონატები 2014 წლის დასაწყისში მიიღო გამოფენისთვის „ყირიმი – შავი ზღვის ოქრო და საიდუმლოები“. კოლექცია 500-ზე მეტი ექსპონატისგან შედგება.

რუსეთის მიერ ნახევარკუნძულის ანექსიის შემდეგ, სადავო გახდა, ვისთვის უნდა გადაეცათ ექსპონატები – ოკუპირებულ ყირიმში მდებარე მუზეუმებისთვის, თუ უკრაინის ხელისუფლებისთვის. 2016 წლის დეკემბერში ამსტერდამის სასამართლომ „სკვითური ოქროს“ უკრაინისთვის გადაცემის გადაწყვეტილება მიიღო, თუმცა ის სეპარატისტული რეჟიმის მიერ მართულმა ყირიმის მუზეუმებმა გაასაჩივრეს.