30 სექტემბრის მონაცემებით, მთიანი ყარაბაღიდან იძულებით დევნილთა რაოდენობამ, რომლებიც სომხეთში ჩავიდნენ, 100 437 ადამიანი შეადგინა, - ამის შესახებ ინფორმაციას სომხეთის პრემიერ-მინისტრის პრესმდივანი ნაზელი ბაგდასარიანი ავრცელებს.

მისი თქმით, ჰაკარის ხიდი ამ დროისთვის 21 062 მანქანამ გადაკვეთა. ნაკადის ინტენსივობა შუაღამის შემდეგ საგრძნობლად შემცირდა.

სომხეთის პრემიერ-მინისტრის პრესმდივნის ცნობით, ამ დროისთვის მთავრობის მიერ შეთავაზებულ განსახლების შეთავაზებას 34 607 ადამიანი დათანხმდა.

ამავე ცნობით, სომხეთის მთავრობა მთიანი ყარაბაღიდან იძულებით გადაადგილებულ ყველა მოქალაქეს სთავაზობს საცხოვრებელს. იძულებით გადაადგილებულმა ზოგიერთმა ადამიანმა ნათესავებთან ან მეგობრებთან სომხეთში დარჩენა არჩია.