მსოფლიოში ყველაზე მშრალ უდაბნოში თოვლი მოვიდა

ALMA-ს ობსერვატორიის ინფორმაციით, ჩილეში მდებარე ატაკამის უდაბნო, რომელიც მსოფლიოში ყველაზე მშრალ უდაბნოდ ითვლება, თოვლით დაიფარა.

,,წარმოუდგენელია! ატაკამის უდაბნო, მსოფლიოში ყველაზე მშრალი, თოვლითაა დაფარული!“ - ნათქვამია ობსერვატორიის მიერ სოციალურ ქსელ X-ზე გავრცელებულ განცხადებაში. 

როგორც გაზეთი Mercurio აღნიშნავს, მანამდე, მეტეოროლოგებმა რეგიონში წვიმა და შტორმი იწინასწარმეტყველეს.

სანტიაგოს უნივერსიტეტის კლიმატოლოგმა რაულ კორდერომ AFP-ს განუცხადა, რომ ჯერ ნაადრევია თოვლის კლიმატის ცვლილებასთან დაკავშირება, თუმცა, კლიმატის მოდელირებამ აჩვენა, რომ „ამ ტიპის მოვლენა, რაც ატაკამის უდაბნოში ნალექიანობას ნიშნავს, უფრო ხშირი გახდება“.