საქართველოს ფეხბურთელთა ეროვნული ნაკრები 2026 წლის მსოფლიო ჩემპიონატის შესარჩევი ჯგუფური ეტაპის მესამე შეხვედრას ქალაქ ელჩეში ესპანეთის ეროვნულ გუნდთან ჩაატარებს. მატჩი 22:45 საათზე დაიწყება, ხოლო პირდაპირ რეპორტაჟს საქართველოს პირველი არხი და პირველი არხი სპორტი შემოგთავაზებთ.

საქართველოს ნაკრები:

ვილი სანიოლის გუნდს შესარჩევ E ჯგუფში ჩატარებული 2 მატჩის შემდეგ 3 ქულა აქვს. საქართველოს ნაკრებს ესპანეთთან შეხვედრისთვის ერთ-ერთი საკვანძო ფიგურა, ოთარ კიტეიშვილი დაუბრუნდა, რომელმაც სექტემბრის თამაშები ტრავმის გამო გამოტოვა.

განაცხადში ასევე დაბრუნდა ლაშა დვალი, რომელიც გარკვეული პერიოდის მანძილზე კლუბის გარეშე გახლდათ, შემდეგ კი ბულგარულ „ცსკა 1948 სოფიას“ შეუერთდა და რეგულარული სათამაშო პრაქტიკა აქვს.

ნაკრების ლიდერმა, ხვიჩა კვარაცხელიამ ტრავმის გამო საფრანგეთის ჩემპიონატის ბოლო ორი ტურის მატჩი გამოტოვა, თუმცა როგორც ვილი სანიოლმა განაცხადა, მისი ფიზიკური მდგომარეობით კმაყოფილია.

ტრავმის გამო ეროვნულ გუნდს კვლავ ვერ დაეხმარება გიორგი ჩაკვეტაძე – ინგლისური „უოტფორდის“ ფეხბურთელს მიმდინარე წლის აპრილის შემდეგ არ უთამაშია.

ესპანეთის ნაკრები:

ევროპის მოქმედი ჩემპიონი საქართველოსთან შეხვედრას საკადრო პრობლემებით ხვდება. ესპანეთს მოახლოებულ შეხვედრაში ლამინ იამალი, როდრი, დინ ჰაუსენი, ნიკო უილიამსი, ფაბიან რუისი და დანი ოლმო ვერ დაეხმარებიან.

ესპანეთის ნაკრებმა 2026 წლის მსოფლიო ჩემპიონატის საკვალიფიკაციო ციკლი წარმატებით დაიწყო – ბულგარეთი 3:0 დაამარცხა, შემდეგ კი გასვლით მატჩში თურქეთს დამაჯერებელი ანგარიშით, 6:0 სძლია.

მთავარი მწვრთნელის, ლუის დე ლა ფუენტეს თქმით, ტრავმირებულ ფეხბურთელებზე არ ნერვიულობს, რადგან დიდი არჩევანი აქვს

1ტვ.