მოსკოვის ვნუკოვოს აეროპორტის ვებგვერდზე თბილისის საერთაშორისო აეროპორტის მიმართულებით პირდაპირი რეისი აღარ იძებნება.

მანამდე, საიტზე ინფორმაცია გამოქვეყნდა, რომლის მიხედვითაც, მოსკოვიდან თბილისის მიმართულებით პირდაპირი რეისები 18 აპრილიდან 28 ოქტომბრის ჩათვლით იყო ჩანიშნული, ფრენები კი ამავე საიტის მიხედვით, Georgian Airways-ს უნდა განეხორციელებინა.

როგორც BMG-ის Georgian Airways-ის დამფუძნებელმა თამაზ გაიაშვილმა განუცხადა, 18 აპრილიდან რუსეთის მიმართულებით პირდაპირ ფრენები ჩანიშნული არ არის.

„არანაირი სააღდგომო რეისი არ არის დანიშნული. მომავალში რა იქნება, არ ვიცი. ჩემთვის ფრენა არავის არ აუკრძალავს. რუსეთის პრეზიდენტმა მაშინ თავის კომპანიებს აუკრძალა, ჩემთვის არავის არ აუკრძალავს“, - აცხადებს თამაზ გაიაშვილი.