მილო ჯუკანოვიჩს თბილისის საერთაშორისო აეროპორტში საგარეო საქმეთა მინისტრის მოადგილე და პრეზიდენტის ადმინისტრაციის წარმომადგენლები დახვდნენ.

საქართველოში ვიზიტის ფარგლებში, მონტენეგროს პრეზიდენტი პირისპირ შეხვედრებს გამართავს საქართველოს პრეზიდენტთან, სალომე ზურაბიშვილთან და პრემიერ-მინისტრთან ირაკლი ღარიბაშვილთან. ორი ქვეყნის დელეგაციებს შორის ასევე გაიმართება გაფართოებული ფორმატის შეხვედრა.

ამასთან, მონტენეგროს პრეზიდენტი საოკუპაციო ხაზის მიმდებარე სოფელს ეწვევა და ადგილზე გაეცნობა არსებულ ვითარებას.

მონტენეგრო 2017 წელს ნატოს 29-ე წევრი სახელმწიფო გახდა. 2009 წლის შემდეგ, ეს ნატოში რიგით მეშვიდე გაფართოება იყო.