მნიშვნელოვანია, კრიზისი გაგრძელდეს ქუჩაში, ანუ აქცია, გაგრძელდეს დასავლეთისგან იზოლაცია, ანუ სანქცია და რაც ყველაზე მნიშვნელოვანია, გამოვაჩინოთ, რომ ალტერნატივა სტატუს კვოზე ბევრად უკეთესია, – ამის შესახებ „ფედერალისტების“ ლიდერმა, თამარ ჩერგოლეიშვილმა ყოფილ პრეზიდენტთან, სალომე ზურაბშვილთან შეხვედრის დასრულების შემდეგ განაცხადა.

მისი თქმით, ასეთ შემთხვევაში ბიძინა ივანიშვილი ძალაუფლების გადაბარების საჭიროებამდე აუცილებლად მივა.

„პრეზიდენტმა მოგვახსენა, რა ხდებოდა მიუნხენში. ჩვენთვის ძალიან მნიშვნელოვანია, რომ „ქართულმა ოცნებამ“ ვერ შეძლოს დასავლეთთან დალაგება, ეს აუცილებლად იქნება ცვლილების ერთ-ერთი კომპონენტი. ასევე შევთანხმდით, რომ ამ მოგონილ საგამოძიებო კომისიაში აქ მსხდომი პარტიებიდან არცერთი ითანამშრომლებს. ეს არის ის შეთანხმება, რასაც მივაღწიეთ. ასევე განვიხილეთ, ცვლილებას როგორ მივაღწიოთ. ჩემი პოზიციაა, რომ მნიშვნელოვანია, კრიზისი გაგრძელდეს ქუჩაში, ანუ აქცია. მნიშვნელოვანია, გაგრძელდეს დასავლეთისგან იზოლაცია, ანუ სანქცია და რაც ყველაზე მნიშვნელოვანია და რასაც პრეზიდენტის შეხვედრები ხელს უწყობს, არის ის, რომ გამოვაჩინოთ, რომ ალტერნატივა სტატუს კვოზე ბევრად უკეთესია და ამ შემთხვევაში აუცილებლად მივა ბიძინა ივანიშვილი ძალაუფლების გადაბარების საჭიროებამდე“, – განაცხადა თამარ ჩერგოლეიშვილმა.