იტალიის სამხრეთ სანაპიროებთან მიგრანტების ნავის ჩაძირვის შედეგად, სულ მცირე 59 ადამიანი დაიღუპა. გავრცელებული ცნობით, დაღუპულთა შორის 12 ბავშვია.

დასავლური მედია წერს, რომ გადატვირთული ნავი დაიშალა, როდესაც ცდილობდა, ბორტზე მყოფი 150-ზე მეტი ადამიანი კალაბრიის რეგიონში, სანაპირო ქალაქ კროტონესთან ნაპირზე გადაეყვანა.

იტალიის შინაგან საქმეთა სამინისტროს ინფორმაციით, 30 ადამიანი ამ დრომდე იძებნება. სანაპირო დაცვის სამსახურმა 80 მიგრანტის გადარჩენა შეძლო.

ნავს, რომელიც რამდენიმე დღის წინ თურქეთიდან გავიდა, ავღანეთის, პაკისტანის, სომალისა და ირანის მოქალაქეები გადაჰყავდა. ერთი გადარჩენილი მიგრანტი ტრეფიკინგის ბრალდებით დააკავეს.

გავრცელებული ინფორმაციით, ნავი ჩაიძირა მას შემდეგ, რაც ის უამინდობის დროს კლდეებს შეეჯახა.