მეუფემ კიდევ ერთხელ მოუწოდა მრევლს სიმშვიდისკენ და ურჩია, დაემორჩილოს საეკლესიო კანონებს.

„მე ამ ხალხსაც ყოველ ნაბიჯზე, მთელი გულით ვლოცავ. მინდა, რომ შინაგანი სიმშვიდე ჰპოვონ და უფლის გზა დაინახონ და უფალთან მივიდნენ, რადგან ახლა რასაც ისინი აკეთებენ, არის, უბრალოდ, საპროტესტო აქცია. კი, შეიძლება, ვიღაცას საპროტესტო აქცია მოსწონს თავისი შინაარსით, მაგრამ ეკლესიაში საპროტესტო აქცია ღვთის საწინააღმდეგო ბრძოლაა. აქ უნდა იყოს ლოცვა და მარხვა. თუ მათ რამის გამოხატვა უნდათ, ლოცვითა და სიყვარულით გამოხატონ. მე არავის არ ვებრძვი, მათთვის, მათი ოჯახებისთვის სიკეთე და ყველაფერი კარგი მინდა. მინდა, რომ ისინი ღვთის წინაშე, სიმართლით დადგნენ და ლოცვა-კურთხევა მიეცეთ, რომ ნორმალურად იმსახურონ, იყვნენ ეკლესიაში და იყვნენ ღვთის წინაშე მადლითა და წყალობით. მათთვის ცუდი არ მინდა. ღმერთმა და მთავარანგელოზმა მისცენ მათ ეს მადლი, რომ ეს გააკეთონ“, - განაცხადა მეუფე სტეფანემ.

ჭყონდიდის ეპარქიაში დილიდან ხმაური და დაპირისპირება იყო. ამჯერად, წაჩხურუს მამათა მონასტერში, წირვის ჩასატარებლად მოსულ მეუფე სტეფანეს განკვეთილი ბერების ნაწილი და მრევლი სიტყვიერად დაუპირისპირდა. შეკრებილები წარწერებითა და ტრანსფარენტებით დახვდნენ მეუფეს, რომელმაც მათ სიმშვიდისკენ მოუწოდა.