მედიის ცნობით, „მოსადმა“ და აზერბაიჯანის დაზვერვამ ირანული ჯგუფის მიერ ბაქო-თბილისი-ჯეიჰანის მილსადენზე საბოტაჟი აღკვეთეს.
ისრაელის საგარეო დაზვერვის სამსახურმა, „მოსადმა“, ისრაელის თავდაცვის ძალებმა და უსაფრთხოების სამსახურმა, „შინ ბეთმა“ ერთობლივი განცხადება გაავრცელეს, რომლის თანახმად, თავდასხმა ასევე იგეგმებოდა ბაქოში ისრაელის საელჩოსა და ადგილობრივ სინაგოგაზე.
განცხადებაში ნათქვამია, რომ სტრუქტურის გამოაშკარავება შესაძლებელი გახდა ისრაელის თავდაცვის ძალების ოპერაცია „ლომის ღრიალის“ დროს განხორციელებული საჰაერო დარტყმების სერიის მეშვეობით, ასევე „მოსადისა“ და მისი პარტნიორების ინტენსიური მუშაობით სხვადასხვა ქვეყნის უსაფრთხოებისა და სამართალდამცავი ორგანოების წარმომადგენლებთან.
განცხადების თანახმად, ოპერაციის შედეგადაც განეიტრალდნენ მაღალი თანამდებობის პირები და მექანიზმის ძირითადი მონაწილეები. ისრაელის მედიის თანახმად, აზერბაიჯანის ხელისუფლებამ დააკავა სამუშაო ჯგუფის წევრები, რომლებსაც ქვეყანაში იმპორტირებული თვითმკვლელი დრონები და ფრაგმენტული ასაფეთქებელი მოწყობილობები აღმოაჩნდათ.
ისრაელის ხელისუფლების ცნობით, ჯგუფი, ირანელი ინსტრუქტორების დავალებით, აგროვებდა ინფორმაციას სამიზნეების შესახებ, მათ შორის აწარმოებდა თვალთვალსა და ფოტოგრაფირებას. ერთობლივ განცხადებაში ნათქვამია, რომ საიდუმლო მექანიზმის ხელმძღვანელი იყო რაჰმან მაკადამი, რომელიც ასევე ხელმძღვანელობდა „ისლამური რევოლუციის გუშაგთა კორპუსის“ სადაზვერვო ორგანიზაციაში მე-4000 სპეციალური ოპერაციების დანაყოფს.
განცხადებაში ნათქვამია, რომ დანაყოფის საქმიანობა განხორციელდა „გუშაგთა კორპუსის“ დაზვერვის ორგანიზაციის ხელმძღვანელის, მაჯიდ ხადემის მითითებებით, რომელიც, ისრაელის თქმით, ოპერაცია „ლომის ღრიალის“ დროს მოკლეს. ერთობლივი განცხადების თანახმად, ლიკვიდირებული იქნა ასევე მეჰდი იახ-დახანი, მეტსახელად „ექიმი“, რომელიც ოპერატიული ოფიცრის თანამდებობას იკავებდა და აზერბაიჯანსა და თურქეთში ხელმძღვანელობდა ოპერაციებს.
0
0
