რუმინეთის ულტრამემარჯვენე ლიდერმა კალინ ჯორჯესკუმ საპრეზიდენტო არჩევნებში საკუთარი კანდიდატურა წარადგინა, - იუწყება AP-ი.

ჯორჯესკუმ განაცხადა, რომ მისი კანდიდატურის დაბლოკვის ყველანაირი მცდელობა წარუმატებელი იქნება.

ჯორჯესკუს წინააღმდეგ გამოძიება რამდენიმე მუხლით, მათ შორის, კონსტიტუციური წესრიგის წინააღმდეგ ქმედების ბრალდებით მიმდინარეობს. მას ქვეყნიდან გასვლა 60 დღით აქვს აკრძალული.

„მე გადავეცი დოკუმენტი 324 000-ზე მეტი ხელმოწერით რუმინელი ხალხისადმი პატივისცემის გამო, რომელსაც ესმის, რომ უნდა დაიცვას თავისი დემოკრატია და სიტყვის თავისუფლება“, - განაცხადა ჯორჯესკუმ.

რამდენიმე დღის წინ, რუმინეთის დედაქალაქში ოპოზიციის პრეზიდენტობის ყოფილი კანდიდატის მხარდასაჭერად ათასობით ადამიანი გამოვიდა.