"მე არავის არ ვუპასუხებ, მაგრამ ძალიან სამწუხაროა, როდესაც შვილებზე გადადიან. ეს მიუღებელია. ეს არის წითელი ხაზი, ეს ყოველგვარი ამორალურობის და უზნეობის დამახასიათებელია, მაგრამ მე მინდა ყველა ჩვენს მტრებს ვუსურვო მშვიდობა, ჯანმრთელობა, მათ შვილებს მინდა ვუსურვო ჯანმრთელობა პირველ რიგში, წარმატება, ბედნიერი მომავალი და ჩვენი ქვეყნის გამთლიანება“, - ამის შესახებ ირაკლი ღარიბაშვილმა, პარლამენტში დასკვნითი სიტყვით გამოსვლისას განაცხადა.

„პოლარიზაციის ხარისხზე მინდა ვთქვა, კიდევ ერთხელ,  ჩვენთვის ყველასთვის არ არის სასიამოვნო პირადი შეურაცხყოფების მოსმენა, მიუხედავად ჩვენი მცდელობისა, ჩვენი დესტრუქციული, ხელმოცარული და მართლაც, დეგრადირებული ოპოზიცია ცდილობს ყველაფერს, რომ რაიმენაირად მოახდინონ პროვოცირება, ადამიანს მიაყენონ შეურაცხყოფა. მათ არაფერი არ დარჩენიათ, გარდა ერთისა - რომ რაიმენაირად კიდევ უფრო მეტი პოლარიზაცია შემოიტანონ, დაძაბულობა, შფოთვა, ქაოსი, არეულობა. შემთხვევით არ დავარქვით ამ ადამიანებს და მათ პარტიას ომის პარტია, ნგრევის, ქაოსის და სიკვდილის პარტია. ყველა ის უბედურება, რაც მათ მოუტანეს ჩვენს ქვეყანას და რაც მათ მმართველობას უკავშირდება. მაგრამ ჩვენ ჩვენი მხრიდან კიდევ უფრო მეტი გონიერება უნდა გამოვიჩინოთ, მეტი მოთმინება გვმართებს, ვინაიდან, ჩვენ ვართ ხელისუფლება. მე არავის არ ვუპასუხებ, მაგრამ ძალიან სამწუხაროა, როდესაც შვილებზე გადადიან. ეს მიუღებელია. ეს არის წითელი ხაზი, ეს ყოველგვარი ამორალურობის და უზნეობის დამახასიათებელია, მაგრამ მე მინდა ყველა ჩვენს მტრებს ვუსურვო მშვიდობა, ჯანმრთელობა, მათ შვილებს მინდა ვუსურვო ჯანმრთელობა პირველ რიგში, წარმატება, ბედნიერი მომავალი და ჩვენი ქვეყნის გამთლიანება“, - განაცხადა პრემიერმა.

ცნობისთვის, დღეს “ლელოს” ერთ-ერთმა ლიდერმა, ანა ნაცვლიშვილმა, პრემიერ-მინისტრს კითხვით მიმართა:

“ძალიან მიხარია, რომ თქვენი შვილი აშშ-ში ისწავლის. ვიცი, რომ სწავლას პენსილვანიის უნივერსიტეტში გააგრძელებს. ძალიან მიხარია… მაგრამ, იცით თუა რა, რომ ეს უნივერსიტეტი ლგბტ საკითხების მიმართ ყველაზე მეგობრულია? ხომ არ გეშინიათ, რომ თქვენს შვილს გადაიბირებენ იქ… არ გიფიქრიათ ამაზე?” - განაცხადა ნაცვლიშვილმა.