ბორჯღალოსნები დღეს 2023 წლის მსოფლიო თასის პირველ მატჩს პარიზში, „სტად დე ფრანსეზე“ ავსტრალიის წინააღმდეგ გამართავენ. თამაში თბილისის დროით 20:00 საათზე დაიწყება. ამავე ჯგუფის პირველი ტურის მეორე მატჩში უელსი ფიჯის 10 სექტემბერს ბორდოში დაუპირისპირდება.

საქართველოსთვის ეს ზედიზედ მე-6 მსოფლიო თასია. აქამდე ჩვენმა გუნდმა საუკეთესო შედეგი 2015 წელს აჩვენა, როდესაც ორი თამაში მოიგო (ტონგასთან და ნამიბიასთან). სამ შემთხვევაში ბორჯღალოსნებმა ჯგუფში თითო თამაში მოიგეს და მხოლოდ პირველ, 2003 წლის მსოფლიო თასზე ვერ მოახერხეს გამარჯვების მოპოვება.

ავსტრალიას ყველა, 9-ვე მსოფლიო თასი აქვს ნათამაშები და ორჯერ გახდა ჩემპიონი – 1991 და 1999 წელს, 2003 და 2015 წელს ფინალში დამარცხდა, 2011 წელს მესამე, ხოლო 1987 წელს მეოთხე ადგილი დაიკავა. „ვოლაბებმა“ ყველა ჯერზე შეძლეს ჯგუფური ეტაპის გადალახვა და სამჯერ დამარცხდნენ მეოთხედფინალში.

9 მსოფლიო თასიდან ავსტრალიამ ორს უმასპინძლა – პირველ, 1987 წლის მსოფლიოს ახალ ზელანდიასთან ერთად და 2003 წელს დამოუკიდებლად.

საქართველოს ავსტრალიასთან ერთადერთხელ უთამაშია – 2019 წლის მსოფლიო თასზე და მეტოქემ 19 ქულის სხვაობით, 27-8 მოიგო. მას შემდეგ, ავსტრალიას ტიერ2-ის წინააღმდეგ აქამდე არც ერთხელ არ უთამაშია.

საქართველოს მატჩი 20:00 საათზე დაიწყება და მას, ისევე როგორც ყველა მატჩს, საქართველოს პირველი არხი შემოგთავაზებთ.

მსოფლიო თასის მონაწილე 20 გუნდი ოთხ ჯგუფადაა განაწილებული. თითოდან მეოთხედფინალში ორ-ორი საუკეთესო გადის.