ღაზაში განხორციელებული ქმედებების გამო ისრაელთან კავშირების შეწყვეტის მოწოდებით, რაბათის ქუჩებში ათასობით მაროკოელი გამოვიდა. საპროტესტო მსვლელობისას დემონსტრანტებს ხელში ეჭირათ პლაკატები წარწერით - "შეწყვიტე ხოცვა-ჟლეტა" და "[ისრაელთან ურთიერთობების] ნორმალიზაცია ღალატია".

გავრცელებული ინფორმაციით, საპროტესტო აქციაში პოლიტიკოსებიც მონაწილეობდნენ. 

როგორც ცნობილია, აშშ-ს შუამავლობით, ,,აბრაამის შეთანხმების“ საფუძველზე, მაროკომ ისრაელთან დიპლომატიური ურთიერთობა 2020 წელს დაამყარა. გარიგების ფარგლებში, ვაშინგტონმა დასავლეთ საჰარას სადავო ტერიტორიაზე მაროკოს სუვერენიტეტი აღიარა. ღაზაში ომის დაწყების შემდეგ კი შეთანხმების მიმართ პროტესტი მკვეთრად გაიზარდა.