ეს [ხაზარაძე] იყო რბილი და ალბათ ერთ-ერთი ყველაზე მახინჯი ძალა იმიტომ, რომ მამუკა ხაზარაძე საკუთარ თავს და „თიბისი ბანკს“ აყენებინებდა სააკაშვილს ფულის შესაგროვებლად ბიზნესმენებისგან და საკუთარ ხეირსაც პოულობდა ამაში, - განაცხადა „2003-2012 წლებში მოქმედი რეჟიმისა და რეჟიმის პოლიტიკური თანამდებობის პირების საქმიანობის შემსწავლელი დროებით საგამოძიებო კომისიის“ ხელმძღვანელმა, პარლამენტის ვიცე-სპიკერმა თეა წულუკიანმა გადაცემაში „იმედი LIVE“.
წამყვანმა მას ჰკითხა, რას ეტყოდა იმ ადამიანებს, რომლებიც კომისიის სხდომაზე არ მიდიან და მისი აზრით, რატომ არ მიდიან ისინი კომისიაზე.
"[კომისიაზე არ მისვლის მიზეზი] ეს არის შიში. ბევრი ვიფიქრე რა არის ამის მიზეზი და რეალურად, მამუკა ხაზარაძეს კომისიაზე მოსვლის ეშინია იმიტომ, რომ საჯაროდ გამოჩნდება საბოლოოდ კიდევ უფრო მახინჯი. როდესაც ვისმენთ რამაზ ახვლედიანის მონაყოლს ლისის ტბასთან დაკავშირებით, ჯემალ ლეონიძის მონათხრობს ბენზინის ბიზნესთან დაკავშირებით და კიდევ მოვისმენთ სხვა საქმეებს მომავალში, სადაც „თიბისი ბანკი“ ფიგურირებს და მამუკა ხაზარაძე ბადრი ჯაფარიძესთან ერთად, რეალურად იკვეთება, რომ მამუკა ხაზარაძე მიხეილ სააკაშვილის ხელში იყო იარაღი მშრომელი ადამიანების წინააღმდეგ.
მამუკა ხაზარაძეს მიუშვებდნენ წარმატებულ ბიზნესმენთან და თუ ეს ბიზნესმენი მაშინვე დათანხმდებოდა მამუკა ხაზარაძის ხელშეწყობასა და ბიზნესში წილის შეტანას და ბიზნესის გაფართოებას, მხოლოდ მოგვიანებით გამოჩნდებოდა შემდეგ ან კეზერაშვილი, ან უგულავა, ან სააკაშვილი. თუ არ დათანხმდებოდა ეს ბიზნესმენი, მაშინ ამ ბიზნესმენს იბარებდნენ და ეუბნებოდნენ, რომ თუ არ გინდა ოქრუაშვილს შეხვდე, შეხვდი ინვესტორს. ასეთ შემთხვევაში ბიზნესმენი თანხმდებოდა ოქრუაშვილის და ციხის შიშით და ეს ინვესტორი, რომელსაც ხვდებოდა, იყო მამუკა ხაზარაძე. ეს [ხაზარაძე] იყო რბილი და ალბათ ერთ-ერთი ყველაზე მახინჯი ძალა იმიტომ, რომ მამუკა ხაზარაძე საკუთარ თავს და „თიბისი ბანკს“ აყენებინებდა სააკაშვილს ფულის შესაგროვებლად ბიზნესმენებისგან და საკუთარ ხეირსაც პოულობდა ამაში. უმრავლესობა ამ ბიზნესების შემდეგ თავად ხაზარაძემ ჩაიგდო ხელში, თუ არ ჩავთვლით ზოგიერთს, რომელიც შემდეგ დავით კეზერაშვილმა და მიხეილ სააკაშვილმა ჩაიგდეს ხელში“, - აღნიშნა წულუკიანმა.
0
0
