“ტაბულას” დამფუძნებელი, თამარ ჩერგოლეიშვილი საგარეჯოში მომხდარ ტრაგედიას ეხმაურება და სოციალურ ქსელში პოსტს აქვეყნებს: 

"რამდენიმე წლის წინ, ჩემს ახლობელს ფსიქიატრიული დახმარება დასჭირდა და ლონდონის ერთერთ კლინიკაში დავაწვინეთ.

ენის ბარიერის გამო, დიდ დროს ვატარებდი მასთან კლინიკაში.

კლინიკის მოსაწევ სივრცეში ბევრი საინტერესო ადამიანი გავიცანი - თავიდან ფეხებამდე აქლემისფერ ქაშმირში გამოწყობილი (ულამაზესი) ლორდი, რომელსაც ნარცისიზმი სტანჯავდა, ჟურნალისტი, რომელსაც მძიმე დეპრესია აწვალებდა...

იქვე იყვნენ ბრგე და ლამაზი კაცები - მეთქი თქვენ აქ რატომ ხართ?

ჩვენ ამერიკელი სამხედროები ვართო, ავღანეთის მისიიდან სახლებში ვბრუნდებით და ორკვირიან სავალდებულო დაკვირვება/მკურნალობას გავდივართ, პოსტ ტრავმატული სტრესული აშლილობა რომ არ დაგვრჩესო, შეიძლება ზოგიერთს მეტხანსაც მოგვიწიოს დარჩენაო.

ცხადია ეს ამბავი იმიტომ არ დამიწერია, რომ ვიცი თვითმკვლელ მკვლელს რა უჭირდა, ან რა მკურნალობა სჭირდებოდა - უბრალოდ მაინტერესებს, ჩვენი ჯარისკაცებიც გადიან თუ არა მენტალური ჯანმრთელობის შემოწმებას და მკურნალობას მისიების შემდეგ.

ვიზიარებ დაღუპულების ოჯახების მწუხარებას და დაჭრილებს მალე გამოჯანმრთელებას ვუსურვებ."- წერს ჩერგოლეიშვილი

პირი, რომელიც საგარეჯოს ცენტრში ისროდა 48 წლის ნოდარ ათუაშვილი იყო. ყოფილი სამხედრო თავდაცვის სამინისტროს 2006-21 წლებში მუშაობდა. მონაწილეობდა ავღანეთის მისიაშიც. საგარეჯოში სპეცოპერაცია რამდენიმე საათის განმავლობაში მიმდინარეობდა. ადგილზე იმყოფებოდა შინაგან საქმეთა მინისტრი ვახტანგ გომელაური.

როგორც ცნობილია, საგარეჯოში გვიან ღამით 6 ადამიანი დაიღუპა და 5 დაშავდა.