მაღალმთიან აჭარაში დამეწყრილი ტერიტორია მთელი ღამის განმავლობაში იწმინდებოდა. აჭარის მთავრობის თავმჯდომარის ხელმძღვანელობით, შედგა საგანგებო სიტუაციების მართვის შტაბის სხდომა. თორნიკე რიჟვაძე ადგილზე არსებულ ვითარებას გაეცნო.

უხვი ნალექის შედეგად, მაღალმთიან აჭარაში გუშინ გამთენიისას მეწყრული პროცესი ათობით ადგილზე განვითარდა.

სტიქიის შედეგად, ხულოსა და ქედის მუნიციპალიტეტებში, დაიღუპა 2 ადამიანი. უსაფრთხო ადგილზე გაყვანილია 100-ზე მეტი ოჯახი. მეწყერი ჩამოვიდა როგორც ადგილობრივი მნიშვნელობის, ისე - ცენტრალურ საავტომობილო გზებზე.

შეგახსენებთ, რომ იმერეთში წუხელ ჩამოწოლილ მეწყერს 3 ადამიანი ემსხვერპლა.  ძებნა-შველის სამუშაობი გრძელდება.