ხვიჩა კვარაცხელიას მიმართ მადრიდის „რეალის“ ინტერესზე ბოლო საათებში ორი ურთიერთგამომრიცხავი ვერსია გავრცელდა. 

პირველის ავტორი ამტკიცებს, რომ სამეფო კლუბი მზადაა, ქართველ ტალანტში 80 მილიონი გადაიხადოს, ხოლო მეორე ვერსიით, მადრიდელებმა ამ განზრახვაზე უარი თქვეს.

fichajes.net – “სერია A-ს ვარსკვლავი, რომელსაც „რეალი“ აკვირდება”

„ხვიჩა კვარაცხელია სეზონის სტარტზე ევროპულ ფეხბურთში ერთ-ერთი ყველაზე დიდი სენსაციაა. ახალგაზრდა ქართველმა ფეხბურთელმა შესანიშნავი თამაში აჩვენა, რის შედეგადაც სულ რაღაც 21 წლის ასაკში ის ლუჩიანო სპალეტის „ნაპოლის“ ერთ-ერთი ლიდერი გახდა. კვარაცხელიამ რამდენიმე მნიშვნელოვანი ევროპული გუნდის ინტერესი გამოიწვია, მათ შორისაა მადრიდის „რეალი“, რომელიც გარკვეული პერიოდი ყურადღებით ადევნებდა თვალყურს თავდამსხმელის განვითარებას.

კვარაცხელიათი კარლო ანჩელოტის გუნდი იმდენადაა დაინტერესებული, რომ სურს საკმარისად სოლიდური შეთავაზება გააკეთოს, რათა კვარა მომავალ სეზონში „სანტიაგო ბერნაბეუს“ ერთ-ერთი ყველაზე დიდი ვარსკვლავი გახდეს, „ნაპოლი“ კი საუკეთესო ფეხბურთელს გაუშვებს, თუ დაახლოებით 80 მილიონ ევროს მიიღებს.

კვარაცხელიას „ნაპოლისთან“ მოქმედი კონტრაქტი 2027 წლის 30 ივნისამდე აკავშირებს – შესანიშნავმა თამაშმა მისი საბაზრო ღირებულება მკვეთრად გაზარდა. 

სხვა დაინტერესებულ გუნდებსაც ზაფხულში მოუწევთ ჯიბეებში ხელის ჩაყოფა, თუ სურთ, გადაიბირონ კვარაცხელია, რომელიც საქართველოში თამაშიდან სულ რაღაც ორ წელიწადში შეიძლება „სანტიაგო ბერნაბეუზე“ მოხვდეს“.

მეორე მხრივ, Defensa Central-ი ამტკიცებს, რომ მადრიდის „რეალმა“ გადაწყვიტა, „ნაპოლის“ 21 წლის სუპერვარსკვლავზე დაკვირვება შეწყვიტოს.

„მადრიდის „რეალს“ უკავშირებენ მზარდი ტალანტებისადმი ინტერესს. როგორც ჩანს, კლუბს სურს კონკურენციის გაზრდა. მომავალ სატრანსფერო „ფანჯარაში“ მადრიდის „რეალის“ პრიორიტეტული სამიზნეები ჯუდ ბელინგემი და ალფონსო დევისი არიან, „სანტიაგო ბერნაბეუზე“ გადასვლის კანდიდატია ასევე იოშკო გვარდიოლი.

წყარო: საქართველოს პირველი არხი