ლევან კობიაშვილი საქართველოს ფეხბურთის ფედერაციის პრეზიდენტად ზედიზედ მესამედ აირჩიეს. ფედერაციის 33-ე საარჩევნო ყრილობა სასტუმრო „რადისონ ბლუ ივერიაში“ გაიმართა.

ყრილობაზე 31 დელეგატიდან 28 გამოცხადდა. ცნობილი გახდა, რომ წესდების დარღვევისთვის და გარიგებული თამაშებისათვის სფფ-ის სუბიექტობიდან გარიცხეს ზუგდიდის „დინამო“.

პრეზიდენტის არჩევნები ყრილობის ბოლოს გაიმართა, სადაც კანდიდატი მხოლოდ ლევან კობიაშვილი იყო. საბოლოოდ, 28 დელეგატიდან ყველამ საქართველოს ნაკრების ყოფილი კაპიტანი აირჩია. ლევან კობიაშვილს პირველად ნდობა 2015 წლის 3 ოქტომბერს გამოუცხადეს, მეორედ – 2019 წლის 15 თებერვალს.

ვეტერანი ქართველი ფეხბურთელი პირველი პრეზიდენტია, რომელიც მესამედ აირჩიეს. 2-2-ჯერ აირჩიეს  ნოდარ ახალკაცი (1990, 1994), მერაბ ჟორდანია (1999, 2002) და ნოდარ ახალკაცი უმცროსი (2005-2007, 2007-2009), ერთხელ პოსტს იკავებდა ზვიად სიჭინავა (2009-2015).

2007 წლის 13 მაისს პრეზიდენტად გიორგი ნემსაძე აირჩიეს, მაგრამ ის ყველაზე ხანმოკლე პერიოდით იყო სფფ-ს თავკაცი – ნემსაძემ გადადგომაზე განცხადება ზუსტად ერთ დღეში, 14 მაისს გააკეთა.