კულტურის მინისტრმა თინათინ რუხაძემ კასპის მუნიციპალიტეტში, სოფელ ხოვლეში ივანე ჯავახიშვილის სახლ-მუზეუმის სარეაბილიტაციო სამუშაოები დაათვალიერა.
სახლ-მუზეუმის სრულ რეაბილიტაციას, კულტურის სამინისტროს მხარდაჭერით, კულტურული მემკვიდრეობის დაცვის ეროვნული სააგენტო ახორციელებს.
ამჟამად მიმდინარეობს ვიზიტორთა ცენტრის რკინაბეტონის ლენტური საძირკვლის მოწყობა და სახლ-მუზეუმის ეზოში განთავსებული ორი დამხმარე ნაგებობისთვის საძირკვლის გრუნტის მოტკეპნის, არმირების, საყალიბე სისტემების მოწყობისა და ბეტონის ჩასხმის სამუშაოები. სახლ-მუზეუმის შიდა სივრცეში იატაკიდან და კედლებიდან მოიხსნა ძველი ნალესობა და კირდუღაბის ხსნარით აღდგა ქვისა და აგურის წყობა.
XX საუკუნეში განხორციელებული არაერთი რეკონსტრუქციის მიუხედავად, სახლ-მუზეუმში ამ მასშტაბის რეაბილიტაცია აქამდე არ ჩატარებულა.
რეაბილიტაციის შედეგად, სრულად რესტავრირდება შენობის ფასადი და შიდა სივრცე; მოეწყობა ახალი სახურავი; რეკონსტრუქცია ჩაუტარდება აღმოსავლეთის ავარიულ კედელს; აღდგება მარანი და მოეწყობა ვიზიტორთა მომსახურების ცენტრი. სახლ-მუზეუმის ტერიტორია სრულად იქნება ადაპტირებული შშმ პირთათვის.
"სასიხარულოა, რომ ივანე ჯავახიშვილის 150 წლის იუბილესთან დაკავშირებით, ხოვლეში მისი სახლ-მუზეუმის აღდგენა მიმდინარეობს. ამ გადაწყვეტილებით გამოვხატავთ მადლიერებას დიდი მეცნიერის წინაშე, მომავალ თაობებს კი მდიდარ მემკვიდრეობას ვუნარჩუნებთ. ამავე დროს, სახლ-მუზეუმის აღდგენა ხელს შეუწყობს რეგიონში ვიზიტორთა რაოდენობის ზრდას", - განაცხადა თინათინ რუხაძემ.
მინისტრთან ერთად, სარეაბილიტაციო სამუშაოები დაათვალიერეს: სახელმწიფო რწმუნებულმა შიდა ქართლის მხარეში სიმონ გულედანმა, კასპის მუნიციპალიტეტის მერმა ვახტანგ მაისურაძემ და კულტურული მემკვიდრეობის დაცვის ეროვნული სააგენტოს გენერალურმა დირექტორმა თეა ონიანმა.
0
0
