ცნობილ პორტუგალიელ ფეხბურთელს, კრიშტიანუ რონალდუს ირანის კანონების დარღვევისთვის 99 როზგი ემუქრება. ამის შესახებ Index HR ირანულ მედიაზე დაყრდნობით იუწყება.

რონალდუ ირანში იმყოფებოდა საუდის არაბეთის გუნდის “ალ-ნასრის” შემადგენლობაში, რომელმაც აზიის ჩემპიონთა ლიგის მატჩი ითამაშა თეირანის “პერეპოლისთან” (და მოიგო ანგარიშით 2:0). 

გარდა სპორტული ნაწილისა, 38 წლის ფეხბურთელის მოგზაურობა ადგილობრივ გულშემატკივრებთან შეხვედრასაც მოიცავდა. მათ შორის იყო მხატვარი ფატიმა, შშმ გოგონა.

საუბრისას რონალდუ მხატვარს ჩაეხუტა და აკოცა, რაც ირანის კანონების დარღვევაა. 

პოტენციური ჯარიმა არის 99 როზგი, რომელიც, სავარაუდოდ, ძალაში შევა მომდევნო ჯერზე, როდესაც პორტუგალიელი ირანს ესტუმრება. ინციდენტის შესახებ მას შემდეგ გახდა ცნობილი, რაც ფორვარდმა ირანი დატოვა.