კეზერაშვილი საქართველოში ჯარს ძარცვავდა, ევროპაში წავიდა და ევროპელი პენსიონრების ძარცვა დაიწყო. ახლა მაინც დაიჭირონ. „ბიბისი“ პროკურატურა არ არის, მაგრამ მისი გამოძიება რეპუტაციულად დამანგრეველია, – ამის შესახებ პარტია „მოქალაქეების“ ლიდერმა, ალეკო ელისაშვილმა განაცხადა.

ელისაშვილის თქმით, „დავით კეზერაშვილი არის იშვიათი გარეწარი“.

„ამ ადამიანმა საქართველოში გაძარცვა ჯარი, მოიპარა ფული და შემდეგ ქვეყნიდან გაიქცა. შემდეგ, „ქართულ ოცნებას“ გაურიგდა „ნაციონალური მოძრაობის“ დაშლის საფასურად. ვიცით, რომ მათი გარიგების საფუძველი პარტიიდან ბოკერიას ჯგუფის გამოყოფა იყო. ამიტომ „ქართულმა ოცნებამ“ თვალი დახუჭა და მას ზრდილობისთვის ეძებნენ, ასე იყო ძებნა გამოცხადებული. სინამდვილეში, მშვიდად და ბედნიერად ცხოვრობდა.

იშვიათი გარეწარი კეზერაშვილი საქართველოში ჯარს ძარცვავდა, ევროპაში წავიდა და ევროპელი პენსიონრების ძარცვა დაიწყო. ახლა მაინც დაიჭირონ. „ბიბისი“ პროკურატურა არ არის, მაგრამ მისი გამოძიება რეპუტაციულად დამანგრეველია. რა თქმა უნდა, ეს გამოძიება საფუძვლად დაედება გამოძიებას ევროპულ ქვეყნებში კეზერაშვილის წინააღმდეგ. კეზერაშვილისნაირი გათახსირებული ხალხის ადგილი ციხეშია. ჩემი ნება რომ იყოს, რაც ჯარს მოპარა, ვარწყევინებდი ბოლო თეთრამდე. ახლა ევროპელებმა უნდა დაიჭირონ“, – აღნიშნა ელისაშვილმა.

როგორც ელისაშვილმა განაცხადა, „სამარცხვინო დღეშია ის ოპოზიცია, ვინც კურტუმგაბზეკილი დადიოდა, კეზერაშვილის დაფინანსებულები და აქეთ ჭკუას გვარიგებდნენ“.

„კეზერაშვილისნაირი ამაზრზენი კაცით ბიძინა ივანიშვილს ვერ დაამარცხებ. მით უმეტეს, ისეთ კაცზეა ლაპარაკი, ვინც ბიძინა ივანიშვილს ნებისმიერ დროს გაურიგდება და გაყიდის კურტუმგაბზეკილ ოპოზიციას. დადგნენ და იმართლონ თავი, გრძელი ენები რომ ჰქონდათ. არ რცხვენიათ, ჯარისა და პენსიონრების ქურდისგან ფულს რომ იღებენ? „ბიბისი“ არ არის არც „ფორმულა“, არც „ტვ პირველი“ და არც „იმედი“, „პოსტივი“. „ქართული ოცნება“ კეზერაშვილს თავზე ხელს 11 წელი რატომ უსვამდა? ვიდრე ევროპარლამენტს ვედავებით, კეზერაშვილი ასე და ისე რატომ არის მოხსენიებული, ხელისუფლება რას აკეთებდა? კეზერაშვილი 18 მილიონიან ბინაში რომ ცხოვრობს, არ იცოდნენ? თარგამაძემ ინტერვიუ თუ ჩაწერა, „ქართული ოცნების“ დაგეშილმა პროკურატურამ ვერ იპოვა? მათთან მაქვს პრეტენზია, თავზე ხელს რატომ უსვამდნენ. ადრე თუ რეზოლუციებში მედიამაგნატი კეზერაშვილი ეგონათ, ახლა ნახავენ, რომ პენსიონრების ქურდია“, – განაცხადა ალეკო ელისაშვილმა.

„ბიბისიმ“ გამოაქვეყნა ჟურნალისტური გამოძიება, სადაც გაშიფრულია ევროპელი პენსიონრების გაძარცვის სქემა, ხოლო თაღლითური სქემის ორგანიზატორად დავით კეზერაშვილია დასახელებული.