ახალგაზრდა პოეტი და რეჟისორი, გიორგი არაბული, ე.წ. აგენტების შესახებ კანონპროექტის განხილვის პარალელურად მიმდინარე პროცესებს, სოციალური ქსელით გამოეხმაურა.

არაბული მე-20 საუკუნის 30-იანი წლების ისტორიულ ფაქტს იხსენებს და ისტორიულ ფოტოს აქვეყნებს.

გიორგი არაბული წერს:

"• 1936 წელს ხევსურეთს “ამერიკელი ჟურნალისტი” ცოლთან ერთად ესტუმრა. ადგილობრივები გაუმასპინძლდნენ და დღეობაზე მიიწვიეს, სადაც საუბარი ისტორია-ეთნოგრაფიის გარდა ქვეყნის მომავალსაც შეეხო. 

• ხევსურები ამბობდნენ, რომ ისინი არ შეეგუებოდნენ ანექსიას და დამპყრობლის წინააღმდეგ აუცილებლად აჯანყდებოდნენ. ყველა, ვინც ამ შეხვედრას ესწრებოდა დააპატიმრეს და დახვრიტეს 1937 წელს, როგორც “უცხოური გავლენის აგენტი”. 

• შეგზავნილი “ჟურნალისტი” ქართველი  კომისარი აღმოჩნდა, რომელიც დაკითხვებს ხევსურებთან თვითონ აწარმოებდა.

• სასამართლოს დასკვნა: “… მონაწილეობას იღებდნენ ხევსურეთში კონტრრევოლუციური აჯანყების მომზადებაში, ამისათვის აწარმოებდნენ კ/რ აგიტაციას და ცდილობდნენ
საზღვარგარეთთან არალეგალური კავშირის დამყარებას…”
• ამ საქმეში მონაწილეობისთვის თოთხმეტი ხევსური დააპატიმრეს და დახვრიტეს. 
* * * 
• დღეს განსახილველი კანონის ერთ-ერთი მუხლი: “… ნებისმიერი პირი, რომელიც ჩართულია სხვა ნებისმიერი პირის ინფორმირებაში ან მისთვის რჩევის მიცემაში საქართველოს საშინაო ან საგარეო პოლიტიკასთან… დაკავშირებით” - ღერენა ლიქოკელი ამ მუხლით დააპატიმრეს და დახვრიტეს 1937 წელს. /ღერენას ჩვენებიდან: “კონტრრევოლუციურ ორგანიზაციაში ზვიადა ლიქოკელი მე არ გადამიბირებია, მე მხოლოდ ვაცნობე.”/

• ეს კანონი არ ეხება - “პირს, რომელიც რელიგიურ, საგანმანათლებლო, მეცნიერულ, აკადემიურ ან სახელოვნებო საქმიანობას კეთილსინდისიერად ეწევა”. 

• რას ნიშნავს კეთილსინდისიერად? ან ვინ დაადგენს ამას? თუ ვიღაც ცენზორი გადაწყვეტს, რომ ჩემი ტექსტი, კომენტარი, კვლევა, ლექსი, მოთხრობა, კინო, სპექტაკლი, სტატია - არაკეთილსინდისიერია ე.ი. მე ვარ “უცხოური გავლენის აგენტი”?! 

• კანონი თუ მიიღეს, გვეყოლება კეთილსინდისიერი და არაკეთილსინდისიერი ხელოვანები.
• “დასმენაზე” ცალკე მუხლია  (!) 
• ეს არის კანონი, რომელსაც დამპყრობელი ქვეყანა დაპყრობილი ხალხის წინააღმდეგ იყენებდა და იყენებს. - წერს გიორგი არაბული და ფოტოს აქვეყნებს:

ფოტოზე: ზვიად ლიქოკელი, ადადა ლიქოკელი, დათვია ლიქოკელი, ბერდია არაბული /1937 წელი/