4 ოქტომბრის მოვლენებთან დაკავშირებით დაკავებულებს ხელისუფლების წარმომადგენლები მოუწოდებდნენ, არ ჩაედინათ კანონსაწინააღმდეგო ქმედებები, რაც არ გაითვალისწინეს, – ამის შესახებ თბილისის მერმა, კახა კალაძემ ჟურნალსიტებს განუცხადა.

მისი თქმით, მათ კანონის წინაშე პასუხი უნდა აგონ.

„ამ ადამიანებს მთელი თვე ჰქონდათ კამპანია, რას აპირებდნენ. ამაზე ღიად საუბრობდნენ. 4 ოქტომბერს კი პროცესის განხორციელება დაიწყეს. მივარდნენ პრეზიდენტის სასახლესთან, შეცვივდნენ ეზოში და ა.შ. შესაბამისმა სამსახურებმა მაღალ დონეზე იმუშავეს. მაშინ ყველას მოვუწოდებდით, არ გადაედგათ კანონსაწინააღმდეგო ნაბიჯი, მაგრამ ამ ადამიანებს ჰქონდათ დავალება, გეგმა, მოეწყოთ სახელმწიფო გადატრიალება. კანონის წინაშე ყველას პასუხი მოეთხოვება“, – განაცხადა კახა კალაძემ.